Joriy yil 28-oktabr kuni Hyatt Regency Tashkent mehmonxonasining anjumanlar zalida O‘zbekiston Respublikasi Moliya vazirligi Jahon banki va Buyuk Britaniya Xalqaro taraqqiyot vazirligi ko‘magida davlat xaridlarini rivojlantirish strategiyasi doyihasi taqdimoti va uning muhokamasiga bag‘ishlangan davra suhbati tashkil etildi.

Davra suhbatida O‘zbekiston respublika tovar-xom ashyo birjasi vakillari, mahalliy tadbirkorlik subyektlari, elektron davlat xaridlari ishtirokchilari va buyurtmachilari ishtirok etdi.

Tadbirdan ko‘zlangan maqsad mas’ul vazirlik va idoralar, davlat korxonalari, tadbirkorlik sub’ektlari, shuningdek, mahalliy va xorijiy mutaxassislar bilan davlat xaridlari tizimini rivojlantirish strategiyasi loyihasini muhokama qilish, davlat xaridlari tizimini yanada rivojlantirish istiqbollarini muhokama qilishdan iborat.

Bundan tashqari, davra suhbati ishtirokchilari uchun Yevropa tiklanish va taraqqiyot banki bilan hamkorlikda ishlab chiqilgan Davlat xaridlari bo‘yicha markaziy axborot portali hamda Jahon banki bilan hamkorlikda yaratilgan Elektron shikoyatlar modulining taqdimoti bo‘lib o‘tdi.

O‘z navbatida O‘zbekiston respublika tovar-xom ashyo birjasi mutaxassislari tadbirkorlarni qiziqtirgan savollarga tushuntirishlar berishdi hamda ularning takliflaridan kelib chiqqan holda kelgusida davlat xaridlari elektron tizimida amalga oshirilishi lozim bo‘lgan bir qator vazifalarni belgilib olishdi.

Tadbir davomida forum ishtirokchilari muhokama qilingan masalalar yuzasidan, shuningdek, davlat xaridlari tizimini rivojlantirishga oid taklif va munosabatlarini bildirdilar.

Manba: Ommaviy kommunikatsiyalar va tashqi iqtisodiy faoliyat bo‘limi