7-noyabr kuni Toshkent shahridagi “Hyatt Regency” mehmonxonasida davlat xaridlari sohasini yanada takomillashtirishga bag‘ishlangan kengaytirilgan davra suhbati o‘tkazildi.

Davra suhbatida yirik davlat korxonalari, vazirlik va idoralar, xususiy sektor vakillari, mahalliy ishlab chiqaruvchi korxonalar mutasaddilari ishtirok etdi.

Tadbirda davlat xaridlari elektron tizimining eng yirik va tajribali operatori – O‘zbekiston respublika tovar-xom ashyo birjasi ham faol qatnashdi.

O‘zbekiston respublika tovar-xom ashyo birjasi 2011-yildan buyon davlat xaridlari elektron tizimini takomillashtirib kelmoqda. Mazkur tizim davlat xaridlari shaffofligini ta’minlash va samaradorligini oshirishda muhim ahamiyatni kasb etadi.

2025-yil 9 oylik yakunlariga ko‘ra birjaning davlat xaridlari bo‘yicha xarid.uzex.uz elektron savdo tizimida o‘tkazilgan savdolar natijasida 7,3 trln so‘mlik byudjet va korporativ buyurtmachilarining mablag‘lari tejaldi. Elektron davlat xaridlarining hajmi esa o‘tgan yilning mos davriga nisbatan 31,2% ga oshdi.

O‘tgan davrda savdo ishtirokchilariga qo‘shimcha qulayliklar yaratish va davlat xaridlari sohasida yangi mijozlarni jalb qilish maqsadida yangi Xarid elektron davlat xaridlari mobil ilovasi ishga tushirildi.

Mobil ilova foydalanuvchilarga davlat xaridlari doirasida elektron do‘konda va boshlang‘ich narxni pasaytirish uchun o‘tkaziladigan auksionda qatnashish imkoniyatini taqdim etadi.

Shuningdek, biznes-jarayonlarni optimallashtirish va ish samaradorligini oshirish maqsadida O‘zbekiston respublika tovar-xom ashyo birjasi sun’iy intellekt (SI) xizmatlarini joriy qila boshladi.

Xususan, birjaning elektron davlat xaridlari tizimida mijozlarni qo‘llab-quvvatlash maqsadida sun’iy intellektga asoslangan zamonaviy yechim bo‘lgan AI Chat-bot xizmati joriy etildi.

Endilikda xarid.uzex.uz platformasida avtorizatsiyadan o‘tgan foydalanuvchilar real vaqt rejimida, birjaning Call-markaziga murojaat qilmasdan, o‘zlarining so‘rovlariga tezkor javoblar va texnik ko‘mak olishlari mumkin.

Raqamli yordamchi qonunchilik, tender o‘tkazish tartibi, hujjatlarni rasmiylashtirish, savdolarda ishtirok etish va davlat xaridlariga oid boshqa masalalar bo‘yicha tezkor maslahat va tavsiyalar beradi.

Mazkur texnologiyani joriy etilishi mijozlarni qo‘llab-quvvatlashni yaxshilaydi, tizim bilan o‘zaro aloqa qilish jarayonini soddalashtiradi va savdo operatsiyalarini bajarishda xatolarga yo‘l qo‘yish ehtimolini kamaytiradi.

Bundan tashqari, elektron davlat xaridlari tizimida buyurtmachi va ishtirokchilar e’lonlarini moderatsiyadan o‘tkazishda sun’iy intellekt (SI) xizmatidan ham foydalanilmoqda.

Kelgusida AI Chat-bot funksiyalarini kengaytirish, sun’iy intellektning yangi xizmatlarini joriy etish va ularni birjaning boshqa elektron savdo platformalariga integratsiya qilish ishlari rejalashtirilgan.

Davlat xaridlari ishtirokchilari uchun qo‘shimcha qulayliklar yaratish maqsadida mahalliy ishlab chiqaruvchilar uchun tovarlar katalogini shakllantirish mexanizmi joriy qilindi hamda O‘zbekiston Respublikasi Adliya vazirligining license.gov.uz elektron litsenziyalash tizimi bilan axborot almashinuvi yo‘lga qo‘yildi.

Bu, o‘z navbatida, mahalliy tadbirkorlar va tovar yetkazib beruvchilarga mahsulotlarni birjaning elektron davlat xaridlari tizimi xarid.uzex.uz ga joylashtirish va sotish jarayonlarini yengillashtiradi.

Davlat xaridlari tizimini takomillashtirish maqsadida markazlashgan xaridlar va farmatsevtika tarmog‘i bo‘yicha farma.uzex.uz ixtisoslashgan platformalar ishga tushirildi hamda ikki bosqichli davlat xaridlari tizimlarining ishga tushirilishi kutilmoqda.

Shuningdek, birjada muloqot va jamoatchilik nazoratining samarali tizimi joriy qilingan. Misol uchun, bugungi kunda birjada @uzexfeedbackbot va @uzexanticorruptionbot telegram botlari faol ishlab kelmoqda.

Davra suhbatida davlat xaridlari bo‘yicha mavjud muammolar va takliflar muhokama qilindi va amaliy yechimlar belgilandi.

Manba: Ommaviy kommunikatsiyalar va tashqi iqtisodiy faoliyat bo‘limi