2024-yil 20-mart kuni O‘zbekiston respublika tovar-xom ashyo birjasining mobilraqam.uzex.uz savdo tizimida o‘tkazilgan raqobatli auksion savdolari natijasiga ko‘ra 1 070 000 000 so‘mlik mobil raqami sotildi. Ushbu ko‘rsatkich birjaning mazkur elektron savdo tizimi ishga tushirilgan paytdan buyon mobil raqamning eng maksimal bahosi hisoblanadi.

Mazkur mobil raqam jismoniy shaxsga mo‘ljallangan bo‘lib, uning boshlang‘ich narxi 200 000 000 so‘mni tashkil qilgan. Uch soatdan ko‘p vaqt mobaynida davom etgan onlayn-savdolar davomida 10 ta talabgor ishtirok etib, ular tomonidan 87 marotaba narx takliflari berilgan. Buning natijasida mobil raqamning boshlang‘ich bahosi 5 barobarga o‘sdi.

Endilikda, auksion g‘olibi mobil raqamni 10 ish kuni davomida uyali aloqa operatorida rasmiylashtirishi kerak.

Eslatib o‘tamiz, O‘zbekiston respublika tovar-xom ashyo birjasining mobilraqam.uzex.uz elektron savdo tizimi 2019-yilda uyali aloqa operatorlarining talab yuqori bo‘lgan mobil raqamlaridan foydalanish imkoniyatlarini kengaytirish maqsadida ishga tushirilgan edi.

Manba: Ommaviy kommunikatsiyalar va tashqi iqtisodiy faoliyat bo‘limi