2025-yil 29-may kuni Nukus shahrida O‘zbekiston respublika tovar-xom ashyo birjasi rahbariyati hamda mahalliy tadbirkorlar o‘rtasida ochiq muloqot bo‘lib o‘tdi.

Ushbu uchrashuv O‘zbekiston Respublikasi Prezidenti va Vazirlar Mahkamasining topshiriqlariga muvofiq, mahalliy tadbirkorlarni qo‘llab-quvvatlash, birja savdosi hamda davlat xaridlari sohasidagi muammoli masalalarni aniqlash va hal etish maqsadida tashkil etildi.

Tadbirda shuningdek birja brokerlari, treyderlar, savdo maydonchalarining registratorlari, tovar ishlab chiqaruvchilar, mahsulot yetkazib beruvchilar, fermerlar va Qoraqalpog‘iston Respublikasining elektron savdolarining boshqa ishtirokchilari ham qatnashdilar.

Uchrashuv davomida tadbirkorlar va birja aʼzolari birja rahbarlari bilan bevosita muloqotga kirishib, o‘zlarini qiziqtirayotgan savollarga aniq va malakali javob olish, shuningdek, dolzarb muammolar bo‘yicha yechimlar topish imkoniga ega bo‘ldilar. Jumladan, tadbirkorlarning birja savdolari, onlayn-auksionlar va elektron davlat xaridlarida ishtirok etishiga oid masalalar o‘rganildi.

Erkin muloqot shaklida o‘tgan uchrashuvda O‘zbekiston respublika tovar-xom ashyo birjasida joriy etilgan so‘nggi o‘zgarishlar va yangiliklar, shuningdek, ushbu sohada qabul qilingan yangi hukumat qarorlarining mazmun-mohiyati batafsil tushuntirildi.

Xususan, 2024-yil 12-sentabrdagi O‘zbekiston Respublikasi Vazirlar Mahkamasining 570-sonli va 2024-yil 2-oktabrdagi 621-son qarorlarining ijrosi muhokama qilindi.

Tadbirkorlarga fermer va dehqon xo‘jaliklarining qishloq xo‘jaligi mahsulotlarini erkin bozor narxlarida realizatsiya qilish uchun mo‘ljallangan birjaning yangi elektron savdo platformasi – UZEX Agro bo‘yicha o‘quv videorolik namoyish etildi.

Taʼkidlanganidek, birjaning Call-markazi operatorlari tadbirkorlarning murojaatlarini (+998 71) 207-00-33 raqami va @uzexfeedbackbot telegram-boti orqali qabul qiladi va ularga tezkor javob beradi.

Biznes jarayonlarni optimallashtirish va ish samaradorligini oshirish maqsadida O‘zbekiston respublika tovar-xom ashyo birjasi sunʼiy intellekt (SI) xizmatlarini joriy eta boshladi. Xususan, birjaning elektron davlat xaridlari tizimida mijozlarni qo‘llab-quvvatlash maqsadida sunʼiy intellektga asoslangan zamonaviy yechim bo‘lgan AI Chat-bot xizmati joriy etildi.

Endilikda xarid.uzex.uz platformasida avtorizatsiyadan o‘tgan foydalanuvchilar real vaqt rejimida, birjaning Call-markaziga murojaat qilmasdan, o‘zlarining so‘rovlariga tezkor javoblar va texnik ko‘mak olishlari mumkin.

Uchrashuv yakunida, tadbirkorlardan kelib tushgan murojaat va takliflarga javoblar berildi, tadbirkorlarning birja faoliyatidagi ishtiroki yuzasidan maslahatlar va amaliy yordamlar ko‘rsatildi.

Manba: Ommaviy kommunikatsiyalar va tashqi iqtisodiy faoliyat bo‘limi