O‘zbekiston respublika tovar-xom ashyo birjasi (UZEX) Boshqaruv raisi Asadulla Qayumov va Chikago tovar birjasi guruhi (CME Group)ning Osiyo-Tinch okeani mintaqasi bo‘yicha Boshqaruvchi direktori Rassel Bitti o‘rtasida uchrashuv bo‘lib o‘tdi.

Uchrashuv davomida birjalararo hamkorlikni kengaytirish, zamonaviy birja savdo mexanizmlarini rivojlantirish bo‘yicha tajriba almashish, shuningdek, O‘zbekistonda fyuchers va boshqa birja derivativlari bozorini shakllantirish masalalari muhokama qilindi.

Alohida eʼtibor Phillip Capital bilan hamkorlikda tashkil etilgan UZEX GLOBAL qo‘shma korxonasi orqali mahalliy tadbirkorlarga xalqaro derivativlar bozorlariga chiqish imkoniyatini yaratish hamda tovar bozori ishtirokchilari uchun narxlar o‘zgaruvchanligi bilan bog‘liq xatarlarni samarali boshqarish, jumladan, xedjirlash mexanizmlarini rivojlantirish masalalariga qaratildi.

Shu nuqtai nazardan, CME Groupning bug‘doy, neft va oltin kabi asosiy tovarlar bo‘yicha fyuchers kontraktlaridan foydalanish imkoniyatlari va ularni mahalliy biznes uchun taqdim etish istiqbollari ko‘rib chiqildi.

Shuningdek, UZEX mutaxassislarining malakasini oshirish, muntazam treninglar va tajriba almashinuvi dasturlarini yo‘lga qo‘yish bo‘yicha fikr almashildi. Bu borada CME Groupning xalqaro tajribasi va ekspertizasidan samarali foydalanish muhim yo‘nalish sifatida qayd etildi.

 

Uchrashuv yakunida tomonlar o‘zaro hamkorlikni uzoq muddatli va strategik asosda izchil rivojlantirish, shuningdek, O‘zbekistonda zamonaviy derivativlar bozorining infratuzilmasi va professional salohiyatini shakllantirishga qaratilgan hamkorlikni davom ettirishga kelishib oldilar.

Manba: Ommaviy kommunikatsiyalar va tashqi iqtisodiy faoliyat bo‘limi