O'zbek
Ўзбек
Русский
English
Elektron davlat xaridlarida ishtirok etish yanada osonlashdi
Mahalliy tovar ishlab chiqaruvchilar va tadbirkorlar uchun qo‘shimcha qulay sharoitlarni yaratish maqsadida O‘zbekiston respublika tovar-xom ashyo birjasi (UZEX)da davlat xaridlari bilan bog‘liq bir qator jarayonlar avtomatlashtirildi.
Xususan, birjaning xarid.uzex.uz elektron davlat xaridlari tizimi “Texnik tartibga solish” milliy axborot tizimi va “Uzbekekspertiza” AJ axborot tizimi bilan integratsiya qilinishi natijasida mahalliy tadbirkorlar 130 mingdan ortiq mahsulotlar bo‘yicha muvofiqlik sertifikatlarini alohida yuklash zaruratidan ozod etildi. Bu esa ofertalarni moderatsiya qilish vaqtini o‘rtacha 30 foizga kamaytirish imkonini berdi.
Shuningdek, davlat xaridlarining milliy do‘kon va ekoplatforma tizimlarida tovarlar katalogi mexanizmi joriy etildi. Natijada mahalliy ishlab chiqaruvchilar uchun avval tizimga joylashtirilgan mahsulotlarni takroran moderatsiyadan o‘tkazish talabi bekor qilinib, ofertalarni joylashtirish jarayoni yanada soddalashtirildi.
Tovarlar katalogi, shuningdek, tovar ishlab chiqaruvchilar va dilerlar o‘rtasidagi shartnomaviy munosabatlarni masofadan boshqarish imkonini berdi. Endilikda ishlab chiqaruvchilar o‘zlarining shaxsiy kabinetlari orqali dilerlarni tanlash, ular bilan elektron shaklda shartnoma tuzish yoki bekor qilish, ularning faoliyatini nazorat qilish va boshqa operatsiyalarni onlayn tarzda amalga oshirishlari mumkin.
Bundan tashqari, ofertalarni moderatsiya qilish jarayonida sunʼiy intellektga asoslangan AI-tahlil xizmati joriy etildi. Ushbu servis orqali tizimga joylashtirilayotgan ofertalardagi tovar nomi, texnik parametrlari, rasmlari hamda hujjatlarning o‘zaro mosligi sunʼiy intellekt yordamida tahlil qilinmoqda.
UZEX zamonaviy raqamli yechimlar asosida mijozlar manfaatida qulayliklar va yangi imkoniyatlarni taqdim etishni davom ettirib, biznesingizni rivojlantirishda ishonchli hamkor bo‘lib qoladi.
Manba: Ommaviy kommunikatsiyalar va tashqi iqtisodiy faoliyat bo‘limi
Boshqa yangiliklar:
- Elektron davlat xaridlarida ishtirok etish yanada osonlashdi
- UZEX haftalik dayjesti (8-14-dekabr)
- Hududlarda davlat xaridlari bo‘yicha tadbirkorlar uchun navbatdagi seminarlar o‘tkazildi
- UZEX haftalik dayjesti (1-7-dekabr)
- Afg‘onistonda O‘zbekiston respublika tovar-xom ashyo birjasi tarmog‘i kengaymoqda
- UZEX haftalik dayjesti (24-30-noyabr)