2024-yilning 26-sentabr kuni “O‘zbekiston respublika tovar-xom ashyo birjasi” AJning markaziy binosida birja xodimlari uchun O‘zbekiston Respublikasining “Raqobat to‘g‘risida”gi Qonunining yangi tahriri mohiyati va ijrosi yuzasidan o‘quv-amaliy seminar tashkil etildi.

“O‘zbekiston respublika tovar xom-ashyo birjasi” AJ Komplayens-nazorat va axborot xavfsizligi Bosh boshqarmasi tashabbusi bilan tashkil etilgan seminarda, yangi tahrirda qabul qilingan O‘zbekiston Respublikasining “Raqobat to‘g‘risida”gi Qonunining maqsadi tovar yoki moliya bozorlarida raqobatning cheklanishiga, shuningdek raqobat yoki tabiiy monopoliya sharoitlarida isteʼmolchilarning huquqlari va qonuniy manfaatlari kamsitilishiga olib keladigan yoki olib kelishi mumkin bo‘lgan harakatlarni nazorat qilishni amalga oshirish hamda ularga chek qo‘yish bilan bog‘liq bo‘lgan, raqobat sohasidagi munosabatlarni tartibga solishdan iborat ekanligi, Raqobat qo‘mitasining yuqori likvidli va monopol turdagi mahsulotlarni realizatsiyasi holatini monitoring qilishi yuzasidan vakolatlari belgilanganligi maʼlum qilindi.

Shu bilan birga, seminar ishtirokchilariga raqobat to‘g‘risidagi qonunchilik talablarini buzganlik uchun belgilangan jazo choralari haqida atroflicha maʼlumotlar berildi. Yangi tahrirdagi “Raqobat to‘g‘risida”gi Qonunining 42-moddasiga muvofiq raqobat to‘g‘risidagi qonunchilik talablarining savdolarga oid qismini buzganlik uchun – savdolarning xo‘jalik yurituvchi subyekt bo‘lgan ishtirokchilariga, davlat xaridlari doirasidagi korporativ buyurtmachilarga, elektron savdolar operatorlariga, tashkilotchilarga – savdolar predmeti boshlang‘ich narxining 3 foizi miqdorida jarimalar solishga sabab bo‘lishi maʼlum qilindi.

Seminar yakunida birja xodimlari o‘zlarini qiziqtirgan savollariga javob oldilar.

Manbaa: "O'zRTXB" AJ PR bo'limi