Joriy yil 29-mayda Xanchjou shahrida (Xitoy) “O‘zbekiston respublika tovar-xom ashyo birjasi” AJ, “Trastbank” xususiy aksiyadorlik banki va “China Zheshang Bank” AJ Xitoy banki o‘rtasida uch tomonlama O‘zaro anglashuv Memorandumi imzolandi.

O‘zbekiston Respublikasi Tashqi ishlar vazirligi ko‘makligida va O‘zbekiston Respublikasining Xitoy Xalq Respublikasidagi elchixonasi yordamida imzolangan mazkur Memorandum qo‘shimcha bank vositalaridan foydalangan holda birja savdolari bo‘yicha hisob-kitoblarni optimallashtirish orqali O‘zbekiston va Xitoy o‘rtasidagi tashqi savdo hajmlarini oshirishga xizmat qiladi. Xususan O‘zbekistonda talab yuqori bo‘lgan oziq-ovqat mahsulotlari va moddiy-texnika resurslarini ochiq birja savdolari orqali tezkor xarid qilish imkoniyati yaratiladi.

Shu maqsadda, tomonlar qo‘shma loyihalarni amalga oshirish, Xitoy yuanida hisob-kitoblarni yo‘lga qo‘yish, CIPS (Chinese International Payment System) transchegaraviy banklararo to‘lovlar tizimiga ulanish va birja savdolarini moliyalashtirishda yaqindan hamkorlik qiladi.

Tadbirda taʼkidlanganidek, birjaning elektron savdo tizimlari tashqi savdolar va hisob-kitoblarning shaffofligi, vaqt va mablag‘ tejamkorligini taʼminlaydi hamda to‘lovlar va tovarni yetkazib berilishini kafolatlaydi.

Maʼlumot uchun: “China Zheshang Bank” Xitoy Xalq Respublikasida (Xanchjou shahrida) joylashgan milliy aksiyadorlik tijorat banki. Bank o‘z faoliyatini rasman 2004 yil 18-avgustda boshlagan. Britaniyaning “The Banker Magazine” jurnali tomonidan o‘tkazilgan “Dunyoning 1000 ta eng yaxshi banki 2022” reytingida 1-darajali kapital bo‘yicha 79-o‘rinni egalladi va China Chengxin International CZBank - eng yuqori AAA kredit reytingini berdi.

Manba: Ommaviy kommunikatsiyalar va tashqi iqtisodiy faoliyat bo‘limi