14-май куни Тошкент давлат иқтисодиёт университетида ўтказилган «Карьера ҳафталиги» доирасида Ўзбекистон республика товар-хом ашё биржаси (UZEX) ҳамда Тошкент давлат иқтисодиёт университети (ТДИУ) ўртасида стратегик ҳамкорлик меморандуми имзоланди.

Тадбирнинг асосий мақсади битирувчиларни иш берувчилар билан тўғридан-тўғри мулоқотга жалб қилиш, амалий тажриба имкониятларини кенгайтириш ҳамда иқтидорли ёшларни меҳнат бозорида малакали кадр сифатида тайёрлашдан иборат бўлди.

Меморандумни Ўзбекистон республикаси товар-хом ашё биржаси Бошқаруви раиси Асадулла Қаюмов ва Тошкент давлат иқтисодиёт университети ректори Тўлқин Тешабаев имзоладилар.

Шунингдек, биржа мутахассислари иштирокида очиқ дарслар, семинарлар ва мастер-класслар ташкил этиш, илмий тадқиқотлар, таҳлилий ишлар ҳамда қўшма инновацион лойиҳаларни амалга ошириш режалаштирилмоқда.

Мазкур меморандум замонавий HR-менежмент ёндашувларини жорий этиш, инсон капитали салоҳиятини ривожлантириш ва республикада биржа савдолари тизими самарадорлигини янада оширишга хизмат қилади.

Манба: Оммавий коммуникациялар ва ташқи иқтисодий фаолият бўлими