Aholi tomorqalarida, fermer va dehqon xo‘jaliklarida yetishtirilgan qishloq xo‘jaligi mahsulotlarini sotish tizimini takomillashtirish, zarur bozor sharoitlarini yaratish orqali aholi va dehqonlar daromadini oshirish maqsadida O‘zbekiston Respublikasi Vazirlar Mahkamasining 2024-yil 2-oktabrdagi “Zamonaviy agrokompleks faoliyatini ilg‘or birja mexanizmlari asosida tashkil etishning qo‘shimcha chora-tadbirlari to‘g‘risida”gi 621-son qarori qabul qilindi.

Mazkur qaror bilan “O‘zbekiston respublika tovar-xom ashyo birjasi” AJ huzurida tashkil qilingan “Agro Exchange” MChJning asosiy vazifalari belgilandi.

Bunda aholi tomorqalarida, fermer va dehqon xo‘jaliklari tomonidan yetishtirilgan qishloq xo‘jaligi mahsulotlarini erkin bozor narxida sotishga ko‘maklashuvchi birjaning “UZEX Agro” elektron savdo platformasi 2024-yil 15-oktabrga qadar ishga tushiriladi.

Shu bilan birga, 2025-yil 1-yanvarga qadar aholidan, dehqon va fermer xo‘jaliklaridan mazkur platforma orqali mahsulot sotganligi uchun vositachilik haqi undirilmaydi.

Mazkur qarorning to‘liq matni bilan “O‘zRTXB” AJ rasmiy vebsaytining Meʼyoriy-huquqiy aktlar bo‘limida tanishib chiqishingiz mumkin.

Manba: Ommaviy kommunikatsiyalar va tashqi iqtisodiy faoliyat bo‘limi