Davlat xaridlari tizimining samaradorligi va shaffofligini oshirish maqsadida O‘zbekiston respublika tovar-xom ashyo birjasining davlat xaridlari bo‘yicha etender.uzex.uz elektron savdo tizimida manfaatlar to‘qnashuvi holatlarini aniqlash mexanizmi joriy etildi.

Bunda, xarid komissiyasining a’zolari va  xarid ishtirokchilari o‘rtasidagi affillanganlik xususiyatlari hamda yetkazib beruvchilar o‘rtasidagi manfaatlar to‘qnashuvi holatlari elektron tizim tomonidan avtomatik tarzda aniqlanadi.

O‘z navbatida, mazkur holatlar aniqlangan taqdirda, elektron tizim xarid komissiyasining a’zosini ovoz berishdan va yetkazib beruvchini esa elektron savdolardan chetlashtirilish imkonini beradi.

Mazkur mexanizm elektron tanlash va tender savdolarida g‘olibni xolislik mezonlari asosida aniqlash va davlat xaridlari sohasida qonunbuzilish holatlarini oldini olishga xizmat qiladi.

 Ma’lumot uchun: Eng yaxshi takliflarni tanlash va tender xarid qilish tartib-taomillarini amalga oshirish turlari hisoblanadi. Xaridlarni tanlash va tender shaklida amalga oshirish tartiblari O‘zbekiston Respublikasining “Davlat xaridlari to‘g‘risida”gi qonuni bilan belgilangan.

Manbaa: "O'zRTXB" AJ PR bo'limi