O‘zbekiston respublika tovar-xom ashyo birjasi elektron davlat xaridlarida ishtirok etayotgan davlat buyurtmachilari uchun va yetkazib beruvchilariga qo‘shimcha qulayliklarni yaratish bo‘yicha ishlarni davom ettirmoqda.

Xususan, O‘zbekiston Respublikasi Prezidentining 2023-yil 10-fevraldagi PF-21-sonli “Tadbirkorlik subyektlarini toifalarga ajratish mezonlari hamda soliq siyosati va soliq maʼmuriyatchiligini yana-da takomillashtirish chora-tadbirlari to‘g‘risida”gi farmoni ijrosini taʼminlash maqsadida, endilikda davlat xaridlarida eng yaxshi takliflarni tanlash va tender savdolarida ishtirokchilar takliflarini baholashda qo‘shilgan qiymat solig‘i summasi inobatga olinmaydigan tizim joriy etildi.

Bunda, davlat buyurtmachilari tomonidan davlat xaridlarini o‘tkazish jarayonida qo‘shilgan qiymat solig‘i (QQS) haqidagi maʼlumot ko‘rsatilmaydi. Xarid ishtirokchilari tanlash va tender bo‘yicha elektron takliflarni o‘zlarining shaxsiy kabinetlari orqali narx taklifini hamda qo‘shilgan qiymat solig‘i (QQS) summasini alohida ko‘rsatgan holda berishlari mumkin.

Natijada etender.uzex.uz tizimi savdo g‘olibini aniqlashda ishtirokchilarning takliflarini qo‘shilgan qiymat solig‘i (QQS) qiymatini hisobga olmagan holda hisoblaydi.

Eslatib o‘tamiz, birjaning etender.uzex.uz davlat xaridlari elektron savdo tizimida davlat buyurtmachilarining ishtirok etish tartibi O‘zbekiston Respublikasining “Davlat xaridlari to‘g‘risida”gi qonuni bilan belgilangan.

Manbaa: "O'zRTXB" AJ PR bo'limi