“AGRO EXCHANGE” MCHJ Jizzax viloyati, Baxmal tumani, “Muzbuloq” MFY hududidagi 100 gektar intensiv bog‘ning 78,1 gektar maydonidagi tomchilatib sug‘orish tizimi uchun nasos uskunalari va ularga tegishli butlovchi qismlarni xarid qilish bo‘yicha eng yaxshi takliflarni tanlash yuzasidan tanlov e’lon qiladi.

1. Xarid predmeti

Bog‘ning sug‘orish tizimi uchun buyurtmachi tomonidan belgilangan texnik talablarga muvofiq quyidagi mahsulotlarni yetkazib berish:

1.      Nasos uskunalari.

2.      Nasos uskunalarini ulash va ulardan foydalanish uchun zarur butlovchi qismlar.

Nasos uskunalari va butlovchi qismlarning turi, soni, quvvati hamda boshqa texnik ko‘rsatkichlari buyurtmachining texnik talablari va spetsifikatsiyasi asosida belgilanadi.

Xarid qilinadigan barcha mahsulotlar yangi, avval foydalanilmagan, sifatli, but va nuqsonsiz hamda belgilangan maqsadda foydalanish uchun to‘liq yaroqli bo‘lishi shart.

Nasos uskunalarining suv uzatish unumdorligi, bosimi, elektr dvigateli quvvati va boshqa texnik ko‘rsatkichlari sug‘orish tizimining talablariga mos bo‘lishi lozim. Butlovchi qismlar taklif etilayotgan nasos uskunalari bilan texnik jihatdan mos kelishi shart.

2. Tanlov ishtirokchilariga qo‘yiladigan talablar

Tanlovda ishtirok etuvchi talabgorlar quyidagi talablarga javob berishi lozim:

• O‘zbekiston Respublikasi qonunchiligida belgilangan tartibda ro‘yxatdan o‘tgan va o‘z faoliyatini qonuniy asosda amalga oshirayotgan bo‘lishi;

• korxona davlat ro‘yxatidan o‘tkazilganiga kamida 6 oy bo‘lgan bo‘lishi;

• soliqlar va boshqa majburiy to‘lovlar bo‘yicha muddati o‘tgan qarzdorligi mavjud bo‘lmasligi;

• insofsiz ijrochilarning yagona reyestriga kiritilmagan bo‘lishi;

• buyurtmachi yoki tanlovning boshqa ishtirokchilari bilan manfaatlar to‘qnashuviga olib keluvchi o‘zaro bog‘liq (affillangan) munosabatlarda bo‘lmasligi;

• shartnoma bo‘yicha o‘z zimmasiga oladigan majburiyatlarni belgilangan muddat va talablar asosida bajarish imkoniyatiga ega bo‘lishi.

Tanlovda belgilangan talablarga javob beruvchi mahalliy va xorijiy korxonalar ishtirok etishi mumkin.

3. Yetkazib berish shartlari

G‘olib deb topilgan yetkazib beruvchi nasos uskunalari va ularga zarur butlovchi qismlarni shartnomada belgilangan muddatlarda, to‘liq hajmda va talab etilgan sifatda yetkazib berishi shart.

Mahsulotlar qabul qilish jarayonida miqdori, butligi, tashqi holati, texnik talablarga muvofiqligi hamda uskunalar va butlovchi qismlarning o‘zaro mosligi bo‘yicha buyurtmachi tomonidan tekshiriladi.

Talablarga javob bermaydigan, nuqsonli yoki buyurtmada belgilangan texnik ko‘rsatkichlarga mos kelmaydigan mahsulotlar qabul qilinmaydi.

4. To‘lov shartlari

Shartnoma imzolangandan so‘ng to‘lovlar tomonlar o‘rtasida kelishilgan va shartnomada belgilangan shartlar asosida amalga oshiriladi.

5. Takliflarni baholash mezonlari

Tijorat takliflarini baholashda quyidagi asosiy mezonlar inobatga olinadi:

• nasos uskunalari va butlovchi qismlarning texnik talablarga muvofiqligi;

• mahsulotlarning sifati va ishonchliligi;

• nasos uskunalarining energiya samaradorligi;

• taklif etilgan narxning maqbulligi;

• yetkazib berish muddati;

• to‘lov shartlarining maqbulligi;

• kafolat va texnik xizmat ko‘rsatish shartlari;

• ishtirokchining shartnoma majburiyatlarini o‘z vaqtida va sifatli bajarish imkoniyati.

Buyurtmachi uchun iqtisodiy va texnik jihatdan eng maqbul bo‘lgan taklif tanlov g‘olibi deb topiladi.

6. Tijorat takliflarini taqdim etish

Barcha manfaatdor tashkilotlar o‘z tijorat takliflarini belgilangan muddatda quyidagi manzillardan biri orqali taqdim etishlari mumkin.

Tijorat taklifida nasos uskunalarining ishlab chiqaruvchisi, modeli, texnik ko‘rsatkichlari, butlovchi qismlar ro‘yxati, mahsulotlar soni, birlik narxi, umumiy qiymati, yetkazib berish muddati, to‘lov va kafolat shartlari ko‘rsatilishi lozim.

Manzil: 100007, Toshkent shahri, Bobur ko‘chasi, 77-uy.

Elektron pochta: zakupki@rtsb.uz yoki e.sodiqov@rtsb.uz

Murojaat uchun:  Elyor Sodiqov — 71 207 00 33 (ichki raqam: 1402).