Alkogol va tamaki mahsulotlarini ishlab chiqarish hamda realizatsiya qilish sohasida samarali nazorat tizimini joriy etish, ularning noqonuniy aylanmasiga chek qo‘yish, biznesni yuritish uchun sog‘lom raqobat muhitini rivojlantirish, iste’molchilar huquqlarini himoya qilish maqsadida O‘zbekiston Respublikasi Prezidentining “Alkogol va tamaki mahsulotlari bozorini tartibga solish hamda ularning noqonuniy aylanmasining oldini olish chora-tadbirlarini kuchaytirish to‘g‘risida” 03.06.2024-yildagi PF-84-son Farmoni qabul qilindi.

Mazkur Farmon ijrosini ta’minlash maqsadida 2024-yil 1-iyuldan boshlab, O‘zbekiston respublika tovar-xom ashyo birjasida isteʼmol etil spirti alkogol mahsulotlari ishlab chiqaruvchilar uchun katta lotlar (400 dalldan oshmagan lotlar), boshqa ishlab chiqaruvchilar (xizmat ko‘rsatuvchilar) uchun esa — kichik lotlar (10 dalldan oshmagan lotlar) orqali sotiladi.

Farmon talablariga muvofiq, isteʼmol va texnik etil spirti xarid qilishga talabgor ishlab chiqaruvchilar, davlat organlari va tashkilotlari O‘zbekiston respublika tovar-xom ashyo birjasining axborot tizimiga (ERI kaliti orqali - https://client.uzex.uz/uz/alcoholtrading) xarid qilish jarayonlarida isteʼmol va texnik etil spirtidan foydalanish hajmi va maqsadlari to‘g‘risidagi maʼlumotlarni joylashtiradi. Agar maʼlumot birja portaliga joylashtirilmasa, xaridor spirt sotib olish bo'yicha birja savdolarida qatnasha olmaydi.

Shu bilan birga, O‘zbekiston respublika tovar-xom ashyo birjasi tomonidan Bosh prokuratura huzuridagi Iqtisodiy jinoyatlarga qarshi kurashish departamenti qoshidagi Alkogol va tamaki bozorini tartibga solish inspeksiyasi va Soliq qo‘mitasiga etil spirti xaridlari to‘g‘risidagi ma’lumotlar mahsulot miqdori va xarid maqsadi kesimida axborot tizimi orqali onlayn rejimda muntazam ravishda taqdim etib boradi.

Farmonning to‘liq matni bilan “O‘zRTXB” AJ rasmiy vebsaytining “Meʼyoriy-huquqiy hujjatlar” bo‘limida tanishib chiqishingiz mumkin.

Manbaa: "O'zRTXB" AJ PR bo'limi