2024-yil 22-aprelda AQSH ekspertlari O‘zbekiston respublika tovar-xom ashyo birjasining Buxoro filialiga tashrif buyurdi.

Tashrifdan ko‘zlangan asosiy maqsad O‘zbekiston respublika tovar-xom ashyo birjasi mutaxassislari, brokerlari va savdo ishtirokchilari uchun tovar derivativlar bozorlari bo‘yicha o‘quv-amaliy seminarlar o‘tkazish va ularda mazkur sohada zarur bilim va ko‘nikmalarni shakllantirishdan iborat bo‘ldi.

Tadbirda, shuningdek, tadbirkorlar, fermerlar, tovar ishlab chiqaruvchilar va birja savdolari bo‘yicha mutaxassislar ishtirok etishdi. Tadbir ochiq muloqot ko‘rinishda bo‘lib o‘tdi, unda qatnashchilar o‘zlarini qiziqtirgan savollarni spikerlarga berib, batafsil javoblar oldilar.

Seminarda AQSH birjalari va birja bozorlarini tartibga soluvchi tashkilotlar misolida tovar derivativlarining asosiy tushunchalari va o‘ziga xos xususiyatlari atroflicha tushuntirildi. Shuningdek, mazkur bozorning huquqiy asoslari va asosiy vazifalari, unda amalga oshiriladigan o‘zaro hisob-kitoblar tartibi hamda bozorning tarkibiy tuzilmasi o‘rganildi.

Trening davomida tovar derivativlari bo‘yicha birja savdo qoidalari, brokerlarni litsenziyalash va savdo ishtirokchilarni akkreditatsiyadan o‘tkazish, birja shartnomalarning spetsifikatsiyasi, savdolarni boshqarish, tartibga solish va nazorat qilish, bozor likvidligini taʼminlash va sohada soliq maʼmurchiligi kabi masalalar batafsil muhokama qilindi.

Alohida eʼtibor Markaziy kontragentning derivativlar bozorida tutgan o‘rni va narxlar o‘zgaruvchanligidan kelib chiqadigan xatarlarni xejerlash, yaʼni sug‘urtalash masalalariga qaratildi. Kafolatli taʼminlash, ochiq pozitsiyalarni yopish va real tovarlarni yetkazib berish masalalari ham ko‘rib chiqildi.

Taʼkidlanganidek, tovar derivativlar bozorini shakllantirilishi korxonalar o‘z faoliyatini samarali va aniq rejalashtirishlari, ishlab chiqarishni kengaytirishlari va yangi ish o‘rinlarini yaratishlari mumkin.

Seminar ishtirokchilari olingan maʼlumotlarni amaliy ahamiyatga ega ekanligini taʼkidlab, tadbir tashkilotchilariga o‘z minnatdorchiligini bildirib o‘tdilar.

Manbaa: "O'zRTXB" AJ PR bo'limi