UZEX: апрель ойида асосий ўзгаришлар
![](https://old.uzex.uz/files/news/temp/uzex-key-events-of-april_86.jpg)
2021 йил январь-апрель ойларида Ўзбекистон республика товар-хом ашё биржасида жами 25,0 трлн сўмлик битимлар тузилди ва ушбу кўрсаткич ўтган йилнинг мос даврига нисбатан 56% га кўпдир. Бунда, тузилган битимлар ҳажмининг 88,4% биржа савдоларига, қолган қисми эса электрон тижорат савдо тизимлари, шу жумладан кўргазма-ярмарка савдолари, электрон давлат харидлари, авторақам ва мобиль рақам онлайн аукционларига тўғри келади.
Жорий йил апрель ойида Ўзбекистон Республикаси Президентининг “Юқори ликвидли ва монопол товарларни сотиш жараёнларига бозор механизмларини жорий этишни давом эттириш чора-тадбирлари тўғрисида”ги қарорига мувофиқ очиқ биржа савдоларига янги турдаги маҳсулотларни жалб қилиш ишлари амалга оширилди.
Хусусан, истеъмол ва техник этил спиртининг асосий харидорлари, шу жумладан алкоголь маҳсулотлари ишлаб чиқарувчи 48 та, фармацевтика йўналишидаги 99 та ва этил спиртини қайта ишлашга ихтисослашган бошқа 305 та корхоналар биржада аккредитациядан ўтди.
“Андижон биокимё”, “Янгийўл биокимё”, “Қўқонспирт”, “Бектемир-спирт” корхоналари биржада спирт маҳсулотлари бўйича стандартлаштирилган биржа шартномаларини очишди. Бунда, “Янгийўл биокимё” АЖ дастлабки 600 декалитр истеъмол этил спиртини бир декалитри учун ўртача 160,0 минг сўмдан сотишга муваффақ бўлди.
Жорий йил апрель ойида “Навоийазот” АЖ ҳам биржа савдолари орқали 4 539 тонна поливинилхлорид (ПВХ) ни маҳсулотнинг бир тоннаси учун ўртача 16,2 млн сўмдан ва 147 тонна формалинни ўртача 2,9 млн сўмдан сотди.
Шунингдек, ўтган ойда биржа савдолари орқали 220 кг кумуш сотилди. Ўтказилган биржа савдолари якунларига кўра 1 грамм кумушнинг ўртача нархи 8 700 сўмни ташкил этди.
Биржанинг котировкалаш варағига киритилган янги турдаги маҳсулотлар бўйича биржадаги нархлар талаб ва таклиф бозор қонунлари асосида шаклланди. Ўз навбатида, тадбиркорлик субъектлари мазкур товар ресурсларидан эркин фойдаланишга, сотувчи корхоналар эса шаффоф биржа савдолари эвазига қўшимча даромад олишга муваффақ бўлишди.
Манбаа: “ЎзРТХБ” АЖ PR бўлими
Бошқа янгиликлар:
- UZEX ҳафталик дайжести (19 - 25 август)
- UZEX ҳафталик дайжести (12 - 18 август)
- UZEX ҳафталик дайжести (5-11 август)
- Давлат харидлари бўйича биржанинг янги хизмати ишга туширилди
- UZEX ҳафталик дайжести (29 июль – 4 август)
- Биржада 2024 йил 1-ярим йил якунларига бағишланган матбуот анжумани бўлиб ўтди