“O‘zbekiston respublika tovar-xom ashyo birjasi” AJning Jizzax filialida “Tadbirkorlik subyektlarining elektron davlat xaridlari tizimidagi ishtirokini kengaytirish” mavzusida o‘quv seminari tashkil etildi. Tadbir O‘zbekiston respublika tovar-xom ashyo birjasining hududiy filiali va O‘zbekiston Respublikasi Moliya vazirligining G‘aznachilik vakillari hamkorligida tashkil etildi.

Seminar davomida davlat xaridlarining yagona elektron tizimi platformasi bo‘yicha yuzaga kelayotgan shikoyat va takliflarini ko‘rib chiqish borasida ham ma’ruza qilindi.

“O‘zRTXB” AJ Jizzax filiali boshqaruvchisining ma’lumotiga ko‘ra, joriy yil 7 oyi davomida davlat xaridlari bo‘yicha qiymati 18 760,2 mlrd. so‘mga teng qariyb 510 mingga yaqin bitimlar tuzildi.

Ta’kidlash kerakki, joriy yilda davlat xaridlari tizimiga qator o‘zgarish va qulayliklar kiritildi. Yagona soliq to‘lovchiga aylangan buyurtmachilarning filiallari davlat xaridlarida mustaqil ishtirok etish imkoniyati soddalashtirildi.

Shuningdek etender.uzex.uz elektron savdo tizimida lotlar bo‘yicha QQS haqida ma’lumotlar aks etadi.

Bundan tashqari, etender.uzex.uz elektron savdo tizimida buyurtmachi tomonidan savdoga chiqarilgan lotlar bo‘yicha xarid komissiya a’zolarini o‘zgartirish imkoniyati qo‘shildi.

Joriy yil 29-sentyabr kuni xuddi shunday seminar Toshkent viloyati Nurafshon shahrida ham tashkil etildi. Tadbir davomida ishtirokchilarga O‘zbekiston Respublikasining “Davlat xaridlari to‘g‘risida”gi Qonuni va O‘zbekiston Respublikasi Vazirlar Mahkamasining 2022-yil 20-maydagi “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risidagi nizomni tasdiqlash haqida”gi 276-son Qarori to‘g‘risida ma’lumotlar berildi.

Yig‘ilishda davlat xaridlari bilan bog‘liq savollarga, shu joyning o‘zida mutaxassislar tomonidan javoblar berildi. Shundan so‘ng tadbirkorlik sub’ektlari va buyurtmachi tashkilotlarning xodimlari tomonidan berilgan takliflar muhokama qilindi.

Manbaa: "O'zRTXB" AJ PR bo'limi