Joriy yil 14-oktabr kuni O‘zbekiston respublika tovar-xom ashyo birjasining davlat xaridlari tizimi mutaxassislari 13-Xalqaro charm, poyabzal va mo‘yna ko‘rgazmasi “UzCharmExpo-2022”da ishtirok etdilar.

Mazkur ko‘rgazma respublika charm-poyabzal va mo‘yna sanoatining eksport salohiyatini yanada oshirish, bu boradagi ichki hamkorlik aloqalarini rivojlantirish va mustahkamlash, shuningdek, yetakchi xorijiy kompaniyalar bilan o‘zaro manfaatli va ishonchli hamkorlik aloqalarni o‘rnatish maqsadida tashkil etilgan.

Xalqaro ko‘rgazmada xorijiy kompaniyalar, xorijiy mehmonlar, mazkur sohaga oid tashkilot va birlashmalar vakillari qatnashdilar.

Ko‘rgazma doirasida marketing, savdo, kadrlar tayyorlash, biznes hamda sanoatni rivojlantirishga oid seminarlar, davra suhbatlari, taqdimotlar o‘tkazildi.

O‘z navbatida birja vakillari davlat xaridlari elektron tizimiga bag‘ishlangan taqdimot o‘tkazdilar. Taqdimot doirasida tadbirkorlar va buyurtmachilarning savdoda ishtirok etish tartibi, shuningdek, etender.uzex.uz va xarid.uzex.uz savdo tizimiga kiritilgan yangiliklar xususida ma’lumot berildi.

Taqdimot so‘nggida birja xodimlari tadbir ishtirokchilarini qiziqtirgan savollariga javob berdilar.

Manbaa: "O'zRTXB" AJ PR bo'limi