Davlat xaridlari tizimi takomillashtirilmoqda
Davlat xaridlarida ishtirok etayotgan buyurtmachi va ishtirokchilarga qo‘shimcha qulayliklar yaratish yo‘lida etender.uzex.uz tizimida takomillashtirish ishlari davom ettirilmoqda.
Davlat xaridlarining etender.uzex.uz elektron savdo tizimida norezident ishtirokchilarning takliflarini xolis baholashning yangi tizimi joriy qilindi.
Norezident ishtirokchilarning takliflarini to‘g‘ri baholash maqsadida davlat buyurtmachisi e’lon joylashtirish vaqtida "Norezidentlar uchun qo‘shimcha xarajatlar" yacheykasiga tegishli belgi qo‘yish orqali xarajat nomi, hisoblash turi hamda xarajatlar qiymatiga ma’lumotlar kiritishni amalga oshiradi. Shu tariqa buyurtmachi tomonidan norezidentlar uchun belgilangan qo‘shimcha xarajatlar e’londa aks etadi. Tizim norezident ishtirokchilarning takliflarini buyurtmachi tomonidan kiritgan qo‘shimcha xarajatlarni inobatga olgan holda hisoblaydi.
Bundan tashqari, etender.uzex.uz elektron tizimida Vazirlar Mahkamasining 2022 yil 20 maydagi 276-son qarori bilan tasdiqlangan “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risidagi nizomni tasdiqlash haqida”gi Nizomga asosan xarid komissiyasining a’zolari va mas’ul kotibi xarid komissiyasining vakolatiga kiritilgan masalalarni ko‘rib chiqish uchun yopiq chat orqali muloqot qilish imkoniyatiga ega bo‘ldi.
Yana bir o‘zgarishlardan biri shundan iboratki, etender.uzex.uz elektron savdo tizimida buyurtmachi komissiya a’zolarini JSHSHIR raqamlari orqali ro‘yxatdan o‘tkazishi mumkin. Bunda, buyurtmachi tomonidan komissiya a’zosini qo‘shayotganda, JSHSHIR va pasport seriya raqamini kiritish orqali pasport ma’lumotlari aks etadi.
Manbaa: "O'zRTXB" AJ PR bo'limi