12 aprel kuni O‘zbekiston respublika tovar-xom ashyo birjasi (O‘zRTXB)ning markaziy ofisida Belarus universal tovar birjasi (BUTB)ning brokerlari va mutaxassislariga sertifikatlarni tantanali ravishda topshirish marosimi bo‘lib o‘tdi. Tadbirda ikki birjaning rahbarlari, mutaxassislari va brokerlari ishtirok etdilar.

Sertifikatlarni topshirish marosimi O‘zRTXB va BUTB o‘rtasida imzolangan Strategik hamkorlik kelishuvining ijrosini taʼminlash doirasida tashkillashtirilgan ikkinchi qo‘shma o‘quv seminarining yakunlari bo‘yicha o‘tkazildi.

“O‘zbekiston respublika tovar-xom ashyo birjasi” AJ Boshqaruvi raisi Ziyoviddin Badriddinov taʼkidlaganidek, brokerlarni o‘zaro akkreditatsiyadan o‘tkazish ikki birja o‘rtasidagi Strategik hamkorlik kelishuvini amalga oshirishning navbatdagi muhim bosqichi bo‘lib, birja mexanizmlarini qo‘llash orqali O‘zbekiston va Belarus o‘rtasidagi tovar ayirboshlash hajmini yana-da oshishiga xizmat qiladi.

“BUTB” OAJ TIF Boshqarma boshlig‘i Aleksandr Bashliy: “Bugungi voqeani shubxasiz tarixiy deb atash mumkin, chunki birjalarimiz brokerlari ilk bor o‘zaro akkreditatsiyadan o‘tkazilmoqda. Bugun O‘zbekiston birjasida akkreditatsiyadan o‘tgan Belarus brokerlik kompaniyalari imzolangan kelishuvlarni darhol amalga oshirishga va dastlabki bitimlarni tuzishga tayyordir”.

Seminarda O‘zbekiston respublika tovar-xom ashyo birjasining savdo platformalari bo‘yicha taqdimotlar o‘tkazilib, ularda xorijiy mijozlar uchun birjada yaratilgan imkoniyatlar tushuntirildi. Shu jumladan, birjada tashqi savdo bitimlarini tuzishda xorijiy kompaniyalar komissiya to‘lovlari va garov mablag‘larini kiritishdan ozod etilganligi aytildi.

Seminar ishtirokchilari birja listingini o‘tkazish va birja savdolarida ishtirok etish tartiblari, o‘zaro hisob-kitoblarning o‘ziga xos xususiyatlari va birjada xarid qilingan tovarlarni yetkazib berish shartlari bilan tanishdilar. Birjaning meʼyoriy-huquqiy bazasi, birja bitimlarini IT-yechimlardan foydalangan holda ro‘yxatdan o‘tkazish va yuritish jarayonlari alohida ko‘rib chiqildi.

Seminar dasturi doirasida O‘zRTXB va BUTB o‘rtasidagi hamkorlikni rivojlantirishning dolzarb masalalariga bag‘ishlangan davra suhbati ham bo‘lib o‘tdi. Tadbir ishtirokchilari qiziqtirgan savollarga O‘zRTXB mutaxassislaridan atroflicha javob oldilar hamda olingan maʼlumotlarning foydali va amaliy ahamiyatga ega ekanligini taʼkidladilar.

Eslatib o‘tamiz, avvalroq, yaʼni joriy yil fevral oyida Minsk shahrida birinchi o‘quv seminari o‘tkazilgan bo‘lib, uning yakunlariga ko‘ra O‘zRTXB brokerlari BUTBda akkreditatsiyadan o‘tkazilgan edi.

Manbaa: "O'zRTXB" AJ PR bo'limi