Davlat xaridlariga bag‘ishlangan seminar o‘tkazildi
Joriy yilning 15-sentabr kuni O‘zbekiston Respublikasi Moliya vazirligi huzuridagi o‘quv markazi binosida O‘zbekiston respublika tovar-xom ashyo birjasi xodimlari ishtirokida “Tadbirkorlik subyektlarining elektron davlat xaridlari tizimidagi ishtirokini kengaytirish” mavzusida o‘quv seminari o‘tkazildi. Tadbir O‘zbekiston Respublikasi Moliya vazirligi hamda “O‘zbekiston respublika tovar-xom ashyo birjasi” AJ tomonidan tashkil etildi.
Elektron davlat xaridlari tizimiga tadbirkorlarni keng jalb etish maqsadida tashkil etilgan o‘quv seminarida davlat buyurtmachilari va ishtirokchilari, xo‘jalik yurituvchi subyektlar va ixtisoslashgan tashkilotlar vakillari ishtirok etishdi.
Uchrashuv avvalida birja vakillari davlat xaridlari elektron tizimida shaffoflikni ta’minlash va sog‘lom raqobatni rivojlantirish bo‘yicha amalga oshirilgan ishlar to‘g‘risida ma’lumotlar taqdim etdilar.
Seminar davomida ishtirokchilarga O‘zbekiston Respublikasining “Davlat xaridlari to‘g‘risida”gi Qonuni va O‘zbekiston Respublikasi Vazirlar Mahkamasining 2022-yil 20-maydagi 276-sonli “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risidagi nizomni tasdiqlash haqida”gi Qarori to‘g‘risida ma’lumotlar berildi.
Seminarda qonun hujjatlariga muvofiq kiritilgan yangiliklar, o‘zgartirishlar va mezonlar, jumladan, birjaning davlat xaridlari elektron savdo tizimida yaratilgan yangi xizmat va qulayliklar haqida batafsil ma’lumot berildi.
O‘quv seminari yakunida tinglovchilar o‘zlarini qiziqtirgan savollarga javob olishdi.
Manbaa: "O'zRTXB" AJ PR bo'limi