2022-yil yanvar-may oylari davomida O‘zbekiston respublika tovar-xom ashyo birjasining e-logistika.uzex.uz logistika portalida jami 3 589,5 mln so‘mga teng 2 781 ta shartnomalar tuzildi.

Portalda yuk tashuvchilar o‘rtasida sof raqobat muhiti shakllanishi natijasida birja tovari xaridorlarining 241,9 mln so‘m mablag‘lari iqtisod qilindi. Ya’ni shaffoflik tamoyillari asosida o‘tkazilgan savdolar natijasida yuk tashish uchun shakllangan o‘rtacha narxlar ularning boshlang‘ich narxiga nisbatan 6,3% ga pasaygan.

Yuk tashish bo‘yicha eng ko‘p buyurtmalar mineral o‘g‘itlar, omuxta yem, va polivinilxlorid kabi mahsulotlar bo‘yicha berilgan bo‘lib, jami 113 ming tonna mahsulot xaridorlarga yetkazilgan. O‘z o‘rnida yuk tashuvchi transportlar tomonidan 500 ming kilometr yo‘l bosib o‘tilgan.

Logistika portalida eng yirik bitimlar Toshkent shahri (730 mln so‘m), Farg‘ona (548,8 mln so‘m) va Buxoro (531,1 mln so‘m) viloyatlarida tuzilgan.

Ayni paytda birjaning logistika portalida jami 2 041 ta yuk tashuvchi korxonalar, 2 145 ta buyurtmachi va 7 953 ta avtotransport vositalari ro‘yxatdan o‘tkazilgan.

Eslatib o‘tamiz O‘zbekiston Respublikasi Prezidentining 2021-yil 17-martdagi PQ-5031-son qaroriga muvofiq, monopol va davlat ishtirokidagi tashkilotlar tomonidan birja savdolarida sotilayotgan mahsulotlarni avtotransportda tashish xizmatlari faqat elektron logistika savdo portali orqali auksion tartibida amalga oshiriladi.

Manbaa: "O'zRTXB" AJ PR bo'limi