Davlat xaridlari tizimida yangi qulayliklar joriy etilmoqda
Davlat xaridlarida ishtirok etayotgan buyurtmachi va yetkazib beruvchilarga qo‘shimcha qulayliklar yaratish maqsadida davlat xaridlari tizimini takomillashtirish ishlari davom ettirilmoqda.
Xususan, O‘zbekiston respublika tovar-xom ashyo birjasining etender.uzex.uz elektron savdo tizimida mahalliy ishlab chiqaruvchilarga nisbatan 15% miqdorida preferensiya qo‘llanilishi yo‘lga qo‘yildi.
Mazkur imtiyoz davlat xaridlarida chet ellik yetkazib beruvchilar bilan bir qatorda kamida uchta mahalliy ishlab chiqaruvchilar ishtirok etgan taqdirda, O‘zbekiston Respublikasi Prezidentining 2020-yil 21-avgustdagi PQ-4812-son va Vazirlar Mahkamasining 2021-yil 29-yanvardagi 41-sonli qarorlariga muvofiq mahalliy ishlab chiqaruvchilarning takliflarini baholashda qo‘llanilmoqda.
Buning uchun buyurtmachi va yetkazib beruvchilar o‘zlarining shaxsiy kabinetlari orqali mazkur preferensiyani qo‘llash bo‘yicha tegishli belgilarni qo‘yishlari talab etiladi. Imtiyoz yetkazib beruvchining takliflarini narx qismini baholashda avtomatik tarzda qo‘llaniladi.
Shu bilan birga, etender.uzex.uz elektron savdo tizimida davlat xaridlari bo‘yicha tuzilgan shartnomalarga qo‘shimcha kelishuv tuzish imkoniyati ham yaratildi. Bunda, davlat xaridlari bo‘yicha tuzilgan shartnoma bo‘yicha to‘lov jadvalini o‘zgartirish, budjet buyurtmachi yoki savdo g‘olibining rekvizitlari o‘zgargan taqdirda yangilangan rekvizitlarni O‘zbekiston Respublikasi Moliya vazirligi G‘aznachiligiga yuborish mumkin.
Shuningdek, Vazirlar Mahkamasining 2022-yil 20-maydagi 276-son qaroriga muvofiq birjaning davlat xaridlari bo‘yicha xarid.uzex.uz elektron savdo tizimida buyurtmachilar tomonidan xodimlarni fuqarolik-huquqiy tusdagi shartnoma asosida jalb etish bilan bog‘liq xaridlarni amalga oshirish imkoniyati yaratildi.
Davlat xaridlari tizimida kiritilayotgan o‘zgarishlar to‘g‘risida batafsil ma’lumotlarni savdo tizimining quyidagi bo‘limida olishingiz mumkin.
Manbaa: "O'zRTXB" AJ PR bo'limi