Birjaning avtoraqam.uzex.uz savdo tizimida yangi qulaylik yaratildi
O‘zbekiston respublika tovar-xom ashyo birjasi mijozlarga qo‘shimcha qulayliklar yaratish maqsadida avtoraqam.uzex.uz elektron savdo tizimida “avtobid” yangi xizmat turini test rejimida joriy etdi.
Mazkur funksiya xaridorlarni avtoraqamlar bo‘yicha o‘tkazilayotgan onlayn-auksionlarni uzluksiz kuzatib, muntazam ravishda o‘zlarining narx takliflarini qo‘lda kiritib borish majburiyatidan ozod etadi.
Buning evaziga, talabgor avtoraqamni xarid qilish uchun o‘zi rozi bo‘lgan maksimal narxni oldindan o‘rnatish imkoniga ega bo‘ladi. Bunda, boshqa talabgorlar oldindan o‘rnatilgan mazkur narx chegarasidan xabardor bo‘lmaydi.
Auksion davomida, “avtobid” funksiyasidan foydalangan savdo ishtirokchisi avtoraqamni, bozorda shakllangan holatdan kelib chiqib, berilgan so‘nggi eng yaxshi narxdan yuqoriroq narxda yoki oldindan o‘rnatilgan maksimal narxda xarid qilishi mumkin. Shuningdek, u raqobatli tartibot yakunlanganga qadar, maksimal narx bo‘yicha avval berilgan limitli buyurtmasini bekor qilishi yoki uning qiymatini o‘zgartirishi ham mumkin.
Auksion davomida amaldagi narx oldindan belgilangan narx limitidan oshib ketgan taqdirda, “avtobid” funksiyasidan foydalangan ishtirokchiga tegishli SMS-xabar yuboriladi. O‘z navbatida, mazkur ishtirokchi, savdolarda o‘z ishtirokini anʼanaviy tarzda davom ettirishi yoki o‘zining yangi maksimal narxini o‘rnatishi mumkin bo‘ladi.
Eslatib o‘tamiz, birjaning avtoraqam.uzex.uz savdo tizimida eng yuqori narx bergan talabgor, savdo g‘olibi sifatida, elektron tizim tomonidan avtomatik tarzda aniqlanadi.
Manbaa: "O'zRTXB" AJ PR bo'limi
Boshqa yangiliklar:
- Birjada 2024-yil 1-chorak yakunlariga bag‘ishlangan matbuot anjumani bo‘lib o‘tdi
- UZEX haftalik dayjesti (6 – 12 – may)
- UZEX haftalik dayjesti (29 – aprel – 5 – may)
- UZEX va UZINFOCOM o‘rtasida o‘zaro hamkorlik memorandumi imzolandi
- UZEX haftalik dayjesti (22 - 28-aprel)
- Buxoroda xorijiy ekspertlar ishtirokida seminar o‘tkazildi