22-dekabr kuni O‘zbekiston respublika tovar-xom ashyo birjasida O‘zbekiston Respublikasi Yoshlar Ittifoqi qoshidagi Imkoniyati cheklangan yoshlar va bolalar markazi aʼzolari tomonidan Yangi yil bayrami munosabati bilan xayriya tadbiri tashkil etildi.

Imkoniyati cheklangan yoshlar qatlamini, jumladan nogiron, ko‘zi ojiz, eshitish qobiliyati cheklangan, muomala layoqatiga ega bo‘lmagan yoshlar manfaatlarini himoya qilishga ko‘maklashish, ularni har tomonlama qo‘llab-quvvatlash, jamiyatda teng imkoniyatlar yaratib berish, huquqiy, psixologik-pedagogik yordam ko‘rsatish hamda xayriya faoliyatini amalga oshirishni o‘z oldiga maqsad qilgan Imkoniyati cheklangan yoshlar va bolalar markazining “Mehrli qo‘llar” loyihasi bugungi kunda minglab sahovatpesha insonlarni birlashtirib kelmoqda. “O‘zbekiston respublika tovar-xom ashyo birjasi” AJ O‘zbekiston Respublikasi Yoshlar Ittifoqi qoshidagi Imkoniyati cheklangan yoshlar va bolalar markazining bir necha loyihalarida homiy sifatida ishtirok etib keladi.

“O‘zbekiston respublika tovar-xom ashyo birjasi” AJ Boshqaruv raisi o‘rinbosari Kamoliddin Xudayberdiyev tadbirni ochib berar ekan, birja bunday xayriya tadbirlarini o‘tkazishda hamkorlik qilishga doim tayyor ekanligini bildirib o‘tdi. O‘z navbatida Imkoniyati cheklangan yoshlar va bolalar markazi rahbari Bahrom Alimov ko‘rsatilayotgan eʼtibor bolalarning quvonchiga quvonch qo‘shayotganligini taʼkidlab, homiylik uchun minnatdorlik bildirdi.

7-sinf o‘quvchisi Boburbek Abduvoitov va 9-sinf o‘quvchisi Amirqul Abdulqosimovning akkordeon va doirada «Poppuri» ijro etib, barchaning olqishiga sazovor bo‘ldi. Ko‘rish qobiliyatida nuqsoni bo‘lgan Shukrona Qosimova, 7-sinf o‘quvchilari Kumush Mahmudjonova, Lazizbek Ibrohimov, 10-sinf o‘quvchisi Iroda Kushayevalar ham chiqish qilib, o‘z isteʼdodlarini namoyish etishdi.

Tadbir davomida bolalarga yangi yil bayrami uyushtirilib, sovg‘alar ulashildi. Bayram tadbiri bolalarning beg‘ubor qalbini yanada quvonchu shodlikka to‘ldirdi.

Manbaa: "O'zRTXB" AJ PR bo'limi