Belarus birjasi vakillari Jizzax viloyatiga tashrif buyurdi
13-aprelda Oʼzbekiston respublika tovar-xom ashyo birjasi (OʼzRTXB) va Belarus universal tovar birjasi (BUTB) oʼrtasida imzolangan Strategik hamkorlik kelishuvining ijrosini taʼminlash doirasida Belarus birjasi vakillari Jizzax viloyatiga tashrif buyurdilar.
Tashrif davomida Belarus delegatsiyasi vakillari va viloyat xokimining birinchi oʼrinbosari Аbdivali Mustanov hamda mahalliy tadbirkorlar bilan uchrashuvlar oʼtkazildi. Uchrashuvlarda zamonaviy birja mexanizmlaridan foydalangan holda ikki tomonlama oʼzaro tovar ayirboshlashni oshirish masalalari muxokama qilindi.
Tadbirda Belarus universal tovar birjasining taqdimoti oʼtkazilib, unda Oʼzbekiston va Belarus birjalari oʼrtasida oʼrnatilgan hamkorlik asosida oʼzbek tadbirkorlari uchun yaratilgan yangi imkoniyatlar haqida batafsil maʼlumotlar berildi hamda tashqi savdo bitimlarini tuzishda birja mexanizmlarining afzaliklari keng tushuntirildi.
Uchrashuvlar yakunlariga koʼra tomonlar birja savdolarining imkoniyatlaridan keng foydalangan holda oʼzaro manfaatli hamkorlikni davom ettirishga kelishib oldilar.
Eslatib oʼtamiz, avvalroq, yaʼni 12-aprel kuni Toshkentda oʼtkazilgan ikkinchi qoʼshma oʼquv seminarining yakunlari boʼyicha Belarus universal tovar birjasining brokerlari va mutaxassislari Oʼzbekiston respublika tovar-xom ashyo birjasida akkreditatsiyadan oʼtkazilgan edi.
Manbaa: "O'zRTXB" AJ PR bo'limi