Gamburg Savdo palatasi bilan ishbilarmonlik aloqalari oʻrnatildi
2023-yilning 28-aprel kuni Gamburg Savdo palatasining Sharqiy Yevropa qoʻmitasi raisi Mirko Novak “Oʻzbekiston respublika tovar-xom ashyo birjasi” AJ (OʻzRTXB) markaziy ofisiga tashrif buyurdi.
Tashrif doirasida xorijlik mehmon va “Oʻzbekiston respublika tovar-xom ashyo birjasi” AJ vakillari oʻrtasida oʻzaro manfaatli hamkorlikni rivojlantirish yuzasidan muzokaralar olib borildi.
Xususan, Germaniyada OʻzRTXB savdo maydonchasini ochish, tadbirkorlarning Oʻzbekiston va Germaniya tovar bozorlariga oʻzaro kirishlarini yengillashtirish maqsadida birja savdolaridan keng foydalanish, etender.uzex.uz platformasida oʻtkaziladigan elektron tender savdolariga Germaniyaning yirik ishlab chiqaruvchilarini bevosita jalb etish masalalari koʻrib chiqildi.
Tashqi savdo bitimlarini tuzishda birja mexanizmlarining afzalliklari va imkoniyatlari alohida eʼtirof etildi. Taʼkidlanganidek, birjaning savdo tizimlari savdo va hisob-kitoblarning shaffofligi, ishonchli tovar ishlab chiqaruvchilar bilan bevosita aloqa oʻrnatish, vaqt va mablagʻ tejamkorliligi, shuningdek toʻlovlarni va tovarni yetkazib berishning kafolatlash kabi afzalliklarga ega.
Uchrashuv yakunlari boʻyicha Germaniya tadbirkorlari orasida birja xizmatlarini ommaviylashtirish, OʻzRTXB savdo platformalarining taqdimoti uchun hamkorlikda ommaviy tadbirlar (forumlar, konferensiyalar)ni oʻtkazish, Gamburg Savdo palatasi bilan hamkorlikni rivojlantirish va Gamburg birjasi bilan toʻgʻridan-toʻgʻri aloqalarni oʻrnatish boʻyicha kelishuvlarga erishildi.
Manbaa: "O'zRTXB" AJ PR bo'limi