Birjaning davlat zaxiralari bo‘yicha ixtisoslashtirilgan platformasida dastlabki e’lonlar joylashtirildi
O‘zbekiston respublika tovar-xom ashyo birjasi O‘zbekiston Respublikasi Vazirlar Mahkamasi huzuridagi Davlat zaxiralarini boshqarish qo‘mitasi bilan birgalikda davzaxira.uzex.uz yangi ixtisoslashtirilgan elektron savdo platformasini ishga tushirdi.
Mazkur platformada davlat zaxiralari mahsulotlarini auksion tartibida xarid qilish va sotishni tashkillashtirish hamda barcha savdo ishtirokchilari uchun teng sharoitlarni yaratib berish maqsadida ishlab chiqilgan va joriy etilgan.
Platformadagi onlayn-auksionlar “O‘zdavzaxira” qo‘mitasi va “O‘zbekiston respublika tovar-xom ashyo birjasi” AJ tomonidan 2022-yil 22-sentyabrda tasdiqlangan savdo qoidalariga muvofiq birjaning an’anaviy ochiqlik, oshkoralik va shaffoflik tamoyillari asosida o‘tkaziladi.
Elektron savdolarda O‘zbekiston Respublikasi rezidentlari va norezidentlari, yuridik shaxslarga va yakka tartibdagi tadbirkorlar ishtirok etishlari mumkin.
Buning uchun xaridorlar ERI kalitidan foydalangan holda birjada ro‘yxatdan va identifikatsiyadan o‘tishlari lozim.
Shuningdek, tuzilgan bitimlar bo‘yicha majburiyatlarni bajarilishini kafolatlash maqsadida savdo ishtirokchilaridan birjaning Hisob-kitob kliring palatasiga zakalat mablag‘larini kiritilishi ham talab etiladi.
Ayni paytda davzaxira.uzex.uz ixtisoslashtirilgan elektron savdo platformasida po‘lat simini sotish bo‘yicha “O‘zdavzaxira” qo‘mitasining dastlabki e’loni joylashtirilgan. Mazkur lot bo‘yicha boshlang‘ich narx mahsulotning bir tonnasi uchun 20 096 153,84 so‘m, yetkazib berish muddati esa 10 kun tashkil qiladi.
Mazkur loyiha O‘zbekiston Respublikasi Vazirlar Mahkamasi huzuridagi Davlat zaxiralarini boshqarish qo‘mitasi va O‘zbekiston respublika tovar-xom ashyo birjasi o‘rtasida 2022-yil 9-fevralda tuzilgan o‘zaro kelishuv asosida amalga oshirilmoqda.
Manbaa: "O'zRTXB" AJ PR bo'limi