Xalqaro birjalar bilan ishbilarmonlik aloqalari rivojlanmoqda
O‘zbekiston Respublikasi Prezidentining 2022-yil 24-noyabrdagi PQ-430-son qarorining ijrosini taʼminlash doirasida jahonning yirik birjalarida keng qo‘llaniladigan savdo mexanizmlari va tovar derivativlarini amaliyotga joriy qilish maqsadida, O‘zbekiston respublika tovar-xom ashyo birjasi birjalararo aloqalarni rivojlantirish bo‘yicha amaliy ishlarni davom ettirmoqda.
Xususan, 22-fevral kuni O‘zbekiston respublika tovar-xom ashyo birjasi (UZEX) va Turkiyada elektr energiyasi va tabiiy gaz bo‘yicha birja savdolari operatori, yaʼni Istanbul energiya birjasi (EXIST)ning rahbariyati va xodimlari o‘rtasida onlayn-uchrashuv bo‘lib o‘tdi.
Uchrashuv davomida birjalarning taqdimotlari o‘tkazildi hamda o‘zaro manfaatli bo‘lgan ikki tomonlama hamkorlik masalalari, shu jumladan yoqilg‘i-energetika resurslari bo‘yicha zamonaviy birja savdolarini tashkil etish bo‘yicha tajriba almashish yuzasidan fikr almashildi.
Tadbir yakunida taraflar o‘zaro manfaatli hamkorlikdan manfaatdor ekanligini tasdiqlab, muloqotni muntazam ravishda, shu jumladan oflayn tarzda ham davom ettirishga kelishib oldilar.
Shuningdek, 23-fevral kuni O‘zbekiston Respublikasining Pokistondagi elchixonasi ko‘makligida Pokiston tovar birjasi (PMEX) vakillari bilan zoom onlayn-muloqot vositasidan foydalangan holda muzokaralar o‘tkazildi.
Onlayn-uchrashuvda 2022-yilda O‘zbekiston respublika tovar-xom ashyo birjasi (UZEX) va Pokiston tovar birjasi (PMEX) o‘rtasida imzolangan O‘zaro anglashuv memorandumida aks ettirilgan hamkorlik masalalari muhokama qilindi.
Pokiston tovar birjasi (PMEX) tovar derivativlari birja savdosini tashkil etish bo‘yicha taqdimot o‘tkazdi. Jumladan, MetaTrader 5 savdo platformasining interfeysi va funksionali namoyish etildi.
O‘z navbatida, Pokiston tovar birjasi (PMEX)ning vakillari tovar segmentida birja spot savdolarini tashkil etish bo‘yicha tajriba almashishdan manfaatdor ekanliklarini bildirdilar.
Uchrashuvda, shuningdek, O‘zbekiston va Pokiston o‘rtasidagi tovar ayirboshlash hajmini oshirishda birja texnologiyalaridan keng foydalanish masalalari ham muhokama qilindi.
Manbaa: "O'zRTXB" AJ PR bo'limi