2023-yil 6-7-iyun kunlari O‘zbekiston respublika tovar-xom ashyo birjasi vakillari Budapesht shahrida (Vengriya) bo‘lib o‘tgan Fyuchers bozorlari uyushmasining (AFM) 25-chi yillik anjumanida ishtirok etishdi.

Tashrifdan ko‘zlangan asosiy maqsad zamonaviy birja savdo vositalarini joriy etishda dunyoning yetakchi birjalari bilan tajriba almashish, birjalararo hamkorlikni kuchaytirish va birja savdolarining dolzarb masalalarini muhokama qilishdan iborat bo‘ldi.

Anjumanda dunyo mamlakatlarining 15 ta yirik tovar va fyuchers birjalari, kliring palatalari, xalqaro tashkilotlar, yetakchi IT-kompaniyalari vakillari ishtirok etib, plenar yig‘ilishlarda birja savdo tizimlarini integratsiyalash, birjalar uchun ilg‘or dasturiy yechimlar, moliyaviy savodxonlik, kliring jarayonlarini optimallashtirish, atrof-muhit muhofazasi va iqlim o‘zgarishini tovar bozorlariga taʼsiri kabi mavzular muhokama qilindi.

Anjuman davomida Fyuchers bozorlari uyushmasi (AFM)ning rahbarlari va aʼzolari uchun O‘zbekiston respublika tovar-xom ashyo birjasining hozirgi holati va istiqbolli rejalari haqida maʼruza qilindi hamda Yuqori texnologiyalar bo‘yicha fond birjasi Nasdaq, Germaniya birjasi (DBG), Tayvan fyuchers birjasi (TAIFEX), Uglerod birjasi (ACX), Exberry IT-kompaniya va boshqa xorijiy kompaniyalar vakillari bilan uchrashuvlar o‘tkazildi.

O‘tkazilgan muzokaralar natijalariga ko‘ra O‘zbekiston respublika tovar-xom ashyo birjasida tovar derivativlarini joriy etishda tajriba almashish va texnik maslahatlar olish, birja savdolarida IT-texnologiyalarini qo‘llash sohalarida konsalting xizmatlaridan foydalanish bo‘yicha kelishuvlarga erishildi.

Shuningdek, anjuman doirasida Fyuchers bozorlari uyushmasi (AFM) aʼzolarining umumiy yig‘ilishi bo‘lib o‘tdi, unda AFMning 2022-yildagi faoliyati yakunlari, moliyaviy hisoboti va Uyushmaning 2023-2024-yillar uchun ish rejalari muhokama qilindi.

Eslatib o‘tamiz, O‘zbekiston respublika tovar-xom ashyo birjasi 2019-yildan buyon Fyuchers bozorlari uyushmasi (AFM)ning to‘liq aʼzosi hisoblanadi.

Maʼlumot uchun: Fyuchers bozorlari uyushmasi (AFM) – turli davlatlarning birjalari, kliring va boshqa tashkilotlarni bog‘laydigan xalqaro notijorat tashkilot. Uyushma yangi savdo turlari va bozorlarni yaratishda ko‘maklashish hamda tashkilot aʼzolari o‘rtasidagi muloqotni rag‘batlantirish maqsadida 1998-yilda Buenos-Ayresda (Argentina) tashkil topgan.

Manbaa: "O'zRTXB" AJ PR bo'limi