Davlat xaridlari bo‘yicha amaliy seminarlar davom etmoqda
O‘zbekiston respublika tovar-xom ashyo birjasi elektron davlat xaridlari tizimini takomillashtirish yuzasidan davlat buyurtmachilari bilan davra suhbatlarini o‘tkazishni davom ettirmoqda.
Mazkur tadbirlarni o‘tkazishdan ko‘zlangan asosiy maqsad elektron davlat xaridlari tizimining samaradorligini oshirish hamda savdolarda davlat buyurtmachilarining ishtirokini qo‘llab-quvvatlash va yengillashtirishdan iboratdir.
Navbatdagi uchrashuvlar yirik davlat buyurtmachilari, shu jumladan “O‘zbekneftegaz” AJ, “O‘zikkilamchiranglimetall” AJ, “Uzbekistan Airport” AJ, “Uzbekistan Airways” AJ, “Olmaliq KMK” AJ va “Geoltexta’minot” DKning xodimlari bilan o‘tkazildi.
Tadbirlar davomida O‘zbekiston respublika tovar-xom ashyo birjasining davlat xaridlari bo‘yicha elektron savdo tizimlarida ishtirok etish tartiblari va afzaliklari haqida batafsil ma’lumotlar berildi.
Shu jumladan, birjaning xarid.uzex.uz va etender.uzex.uz savdo tizimlarida onlayn ro‘yxatdan o‘tish, davlat xaridlari bo‘yicha reja-jadvallar va e’lonlarni joylashtirish hamda shartnomalarni tuzish tartibotlari tushuntirildi.
Shu bilan birga, elektron davlat xaridlari sohasida kiritilgan so‘nggi o‘zgarishlar va yangiliklar hamda buyurtmachi va yetkazib beruvchilar uchun yaratilgan qo‘shimcha qulayliklari bo‘yicha alohida taqdimotlar o‘tkazildi.
O‘z navbatida, seminarlar ishtirokchilari davlat xaridlari buyurtmachilari va yetkazib beruvchilarning reytingini tuzish, shaxsiy kabinetlar imkoniyalarini kengaytirish, shu jumladan ma’lumotlarni izlash va hisobotlarni shakllantirish bo‘yicha yangi xizmatlarni joriy etish yuzasidan o‘z takliflarini kiritdilar.
Uchrashuvlar doirasida buyurtmachi tashkilotlarning xodimlari elektron davlat xaridlariga doir o‘zlarining qiziqtirgan barcha savollariga javob oldilar.
Manbaa: "O'zRTXB" AJ PR bo'limi