UZEX birjasi 2022-yilda korporativ boshqaruv bo‘yicha eng yaxshi kompaniya deb e'tirof etildi
2023-yil 31-mart kuni O‘zbekiston Respublikasi Investitsiya institutlari milliy uyushmasi (NAII) tomonidan 2022-yil yakunlari bo‘yicha “O‘zbekiston kapital bozorida eng yaxshi” tanlovi g‘oliblarini taqdirlash marosimi bo‘lib o‘tdi.
Tanlov yakuniga ko‘ra, 2022-yilda “Eng yaxshi korporativ boshqaruv” nominatsiyasida “O‘zbekiston respublika tovar-xom ashyo birjasi” AJ g‘olib bo‘ldi.
Birjaning samarali korporativ boshqaruvi jamiyatning menejerlar va aksiyadorlar o‘rtasidagi muvozanatni taʼminlaydi, biznes jarayonlarini optimallashtiradi, uning faoliyatining shaffofligini oshiradi hamda kompaniyaning barqaror va izchil rivojlanishiga xizmat qiladi.
MDH davlatlari xalqaro birjalar uyushmasining hisobotiga ko‘ra, O‘zbekiston respublika tovar-xom ashyo birjasi yaratilgan infratuzilma va elektron savdo maydonchalari, sotiladigan tovarlarning assortimenti va savdolar hajmi bo‘yicha MDH mamlakatlarining tovar birjalari orasida yetakchi o‘rinni egalaydi.
UZEX birjasida amalga oshiriladigan tranzaksiyalarning yillik hajmi 13,0 mlrd AQSH dollaridan oshadi, bu esa O‘zbekiston Yalpi Ichki Mahsulotining qariyb 16% ga teng demakdir. Birjada asosiy platforma – birja savdolaridan tashqari elektron tijorat sohasiga aloqador bo‘lgan 5 ta savdo tizimlari mavjud.
Birjaning tarkibiy tuzilmasiga 14 ta hududiy filiallar hamda respublikaning barcha tumanlarida joylashgan 400 dan ziyod savdo maydonchalari va dunyoning turli mamlakatlarida o‘z faoliyatini yuritib kelayotgan qariyb 40 ta xorijiy savdo maydonchalari kiradi. Shu bilan birga, birja mijozlarining umumiy soni 500 mingtadan ortiqdir.
Yuqori rentabellik va to‘lanayotgan dividendlar miqdorining muntazam ravishda o‘sib borishi evaziga O‘zbekiston respublika tovar-xom ashyo birjasining aksiyalari fond bozorida katta talabdan foydalanadi.
Xususan, “Toshkent” Respublika fond birjasida “O‘zbekiston respublika tovar-xom ashyo birjasi” aksiyadorlik jamiyati aksiyalarining bozor narxi ularning nominal qiymatiga nisbatan 30 marotabaga ko‘pdir. Shu bilan birga, kompaniya har yili sof foydaning 85% dan ortig‘ini aksiyadorlarga yuboradi, ulardan 1,8 mingtasini minoritar aksiyadorlar tashkil qiladi.
Manbaa: "O'zRTXB" AJ PR bo'limi