O'zbek
Ўзбек
Русский
English
O‘zbek brokerlari Belarus birjasida akkreditatsiyadan o‘tdi
O‘zbekiston respublika tovar-xom ashyo birjasi (O‘zRTXB)ning brokerlari Belarus universal tovar birjasi (BUTB)da akkreditatsiyadan o‘tkazildi.
BUTBning markaziy ofisida o‘tkazilgan brokerlik sertifikatlarini tantanali topshirish marosimida ikki birjaning rahbarlari, mutaxassislari va brokerlari hamda O‘zbekiston Respublikasining Belarus Respublikasidagi elchixonasining vakillari ishtirok etdi.
O‘zbekiston Respublikasining Belarus Respublikasidagi elchixonasi savdo-iqtisodiy masalalar bo‘yicha maslahatchisi Kamoliddin Xasanov ta’kidlaganidek, O‘zbekiston bilan Belarus o‘rtasidagi birja savdosi jadal sur’atlar bilan rivojlanib, sifat jihatidan yangi bosqichga ko‘tarilmoqda.
.jpg)
O‘z navbatida, BUTB Boshqaruv raisi Aleksandr Osmolovskiy o‘zbek birjasining brokerlarini akkreditatsiyadan o‘tkazilishi birjalararo hamkorlikning mutlaqo yangi shakli ekanligi va bu katta sinergik samara berishi hamda Belarus va O‘zbekiston tadbirkorlik subyektlariga amaliy foyda keltirishini aytib o‘tdi.
BUTBda o‘zbek brokerlarining akkreditatsiyasi 2018-yilda ikki birja o‘rtasida imzolangan hamkorlik kelishuvining ijrosi doirasida Minskda o‘tkazilgan dastlabki qo‘shma o‘quv seminari yakunlari bo‘yicha o‘tkazildi.
Belarus-O‘zbekiston birja savdosini rivojlantirish istiqbollariga bag‘ishlangan mazkur seminarda O‘zbekiston tovar birja bozorining 20ta mutaxassislari va professional ishtirokchilari ishtirok etdilar.
O‘quv mashg‘ulotlari davomida o‘zbekistonlik mutaxassislar Belarus Respublikasida brokerlik faoliyatini yuritish jihatlari, shu jumladan birjada akkreditatsiyadan o‘tish tartibi, ishlash sxemasi va me’yoriy-huquqiy bazasi hamda birja savdosining xususiyatlari, narxlarni tartibga solish vositalari va birja bitimlarini qo‘llab-quvvatlash tizimi bilan batafsil tanishib oldilar.
Tadbir ishtirokchilari o‘quv seminarning yuqori saviyada tashkil etilganligini hamda olingan ma’lumotlarning dolzarbligi va amaliy ahamiyatga ega ekanligini ta’kidlab o‘tdilar. Xususan, O‘zbekiston respublika tovar-xom ashyo birjasi Jizzax filialining brokeri (BK-6578) Xatam Xamroyev ta’kidlaganidek, seminar davomida olingan bilim va ko‘nikmalar o‘zbek brokerlarini BUTB savdo platformalarida samarali ishlash uchun xizmat qiladi.
“Barchasi a’lo darajada tashkillashtirildi, malakali xodimlar va ma’lumotlarni qiziqarli tarzda yetkazilishi taxsinga loyiq. Seminarning amaliy jihatlari juda ma’qul keldi, bu brokerlik idoramiz faoliyatining natijadorligiga ijobiy ta’sir ko‘rsatadi” – dedi O‘zbekiston respublika tovar-xom ashyo birjasi Xorazm filialining brokeri (BK-12643) Azamat Masharibov.
O‘zbekiston respublika tovar-xom ashyo birjasining 772-son brokerlik idorasining rahbari Jasur Shoahmedov: “Yuqori saviyada tashkil etilgan o‘quv seminari tufayli biz birja savdolari sohasidagi amaliy bilimlarimizni yangilashga, ayniqsa, eksport-import bitimlarini tuzish bo‘yicha Belarus tajribasini o‘rganishga muvaffaq bo‘ldik. Shuningdek, Belarus Respublikasida brokerlik faoliyatining o‘ziga xos xususiyatlarini bilib oldik. BUTBda o‘zbek brokerlarining akkreditatsiyadan o‘tkazilishi mamlakatlarimiz tovar bozorlariga o‘zaro kirish imkoniyatlarini kengaytiradi hamda O‘zbekiston va Belarus o‘rtasidagi tovar ayirboshlash hajmini yanada oshirishga xizmat qiladi”.
“Mazkur seminar birjalarimiz o‘rtasidagi o‘zaro manfaatli hamkorlikning mutlaqo yangi bosqichga olib chiqmoqda. Menga seminarni tashkil etish usuli va yengil o‘zlashtiriladigan taqdimotlar juda yoqdi. Yaqin kelajakda biz o‘zbekistonlik va belaruslik tadbirkorlar ishtirokida ilk birja bitimlarini tuzish niyatidamiz” – dedi O‘zbekiston respublika tovar-xom ashyo birjasining 676-son brokerlik idorasi direktori Malik Saxatkurbanov.
Seminar dasturi doirasida BUTB va O‘zRTXB o‘rtasida birja savdosi sohasidagi hamkorlikning dolzarb masalalariga bag‘ishlangan davra suhbati ham bo‘lib o‘tdi. Tadbir ishtirokchilari brokerlik faoliyatini yuritish bo‘yicha ilg‘or tajriba bilan almashib oldilar hamda hamkorlikning istiqbolli yo‘nalishlarini muhokama qildilar.
Manbaa: "O'zRTXB" AJ PR bo'limi