Andijonda davlat xaridlari bo‘yicha davra suhbati o‘tkazildi
![](https://old.uzex.uz/files/news/temp/round-table-on-public-procurement-was-held-in-andijan_65.jpg)
2022 yil 19 iyul kuni Andijonda tadbirkorlik sub’ektlari va ommaviy axborot vositalari ishtirokida davlat xaridlari timizi bo‘yicha davra suhbati o‘tkazildi.
Mazkur tadbir O‘zbekiston Respublikasi Prezidenti tomonidan belgilangan vazifalardan kelib chiqqan holda O‘zbekiston respublika tovar-xom ashyo birjasi faoliyatini yanada rivojlantirish hamda tadbirkorlik sub’ektlarining davlat xaridlari tizimidagi ishtirokini kengaytirish maqsadida tashkillashtirildi.
Davra suhbatida mahalliy tadbirkorlik sub’ektlari, elektron davlat xaridlari ishtirokchilari, brokerlar, treyderlar va ommaviy axborot vositalari vakillari ishtirok etdilar.
![](https://old.uzex.uz/Content/images/IMG_4624.jpg)
![](https://old.uzex.uz/Content/images/IMG_4615.jpg)
Tadbirda qatnashgan tadbirkorlar va korporativ mijozlar birja rahbarlari va mutaxassislari bilan bevosita muloqotga kirishib, o‘zlarini qiziqtirayotgan savollarga va muammolarni bartaraf etishga oid javob oldilar. Xususan, uchrashuvda elektron davlat xaridlari tizimini takomillashtirish, birja mijozlariga sifatli xizmat ko‘rsatish, interaktiv xizmatlar sonini ko‘paytirish masalalari ko‘rib chiqildi.
Ta’kidlanganidek, O‘zbekiston respublika tovar-xom ashyo birjasi davlat xaridlari elektron tizimining operatori sifatida davlat xaridlari tizimida shaffoflikni oshirish va qo‘shimcha qulayliklarni yaratish maqsadida 2021 yilda xarid.uzex.uz yangi yagona portalini joriy etgan.
Ayni paytda mazkur portalda davlat xaridlarining barcha turlari birlashtirilgan va mahsulotlarning barcha parametrlarini aks ettiruvchi tovarlar va xizmatlarning yagona milliy klassifikatori joriy etilgan.
Portal onlayn tarzda bir marotaba ro‘yxatdan o‘tish, birjaning hisob-kitob palatasidagi yagona hisobvaraqdan foydalanish va “road map” funksiyasi orqali tuzilgan bitimlar ijrosini kuzatish imkoniyatlarini taqdim etadi.
2022 yilning yanvar-iyun oylarida davlat xaridlari bo‘yicha elektron savdo tizimi xarid.uzex.uz da tuzilgan bitimlarning umumiy hajmi 2021 yilning mos davriga nisbatan 3,8 marotabaga oshib, qariyb 15,0 trln so‘mni tashkil qildi. Bunda budjet va korporativ buyurtmachilari mablag‘larining tejalishi 3 marotabaga o‘sib, 2,2 mlrd so‘mga teng bo‘ldi.
Joriy yilda, shuningdek, buyurtmachi va ishtirokchilarga qo‘shimcha qulaylik yaratish maqsadida elektron davlat xaridlarida ishtirok etish bo‘yicha videoyo‘riqnomalar ishlab chiqildi va ijtimoiy tarmoqlar orqali keng tarqatildi.
Birjaning Call-markazi operatorlari (+71) 207-00-33 telefon raqami va @uzexfeedbackbot telegram boti orqali elektron davlat xaridlari bo‘yicha murojaatlarni qabul qilib, ularga tezkor javob qaytarishmoqda.
![](https://old.uzex.uz/Content/images/IMG_4635.jpg)
![](https://old.uzex.uz/Content/images/IMG_4646.jpg)
![](https://old.uzex.uz/Content/images/IMG_4653.jpg)
Shu bilan birga, davlat xaridlari tizimining samaradorligini oshirish hamda portalga tadbirkorlik sub’ektlarini yanada kengrok jalb qilish maqsadida davlat xaridlari bo‘yicha tanlash va tender elektron tizimi – etender.uzex.uz takomillashtirish, xarid.uzex.uz portalini Davlat soliq qo‘mitasi va Davlat xizmatlari agentligi bilan ma’lumotlar bazalari, hamda “Shaffof qurilish” milliy axborot tizimi bilan integratsiyalash rejalashtirilgan.
Davra suhbatida birja rahbarlari va mutaxassislari seminar ishtirokchilari qiziqtirgan barcha savollarga javob berdilar, davlat xaridlari bo‘yicha kiritilgan taklif va mulohazalar ko‘rib chiqish va ular yuzasidan tegishli qarorlar chiqarish uchun qabul qilindi.
Manbaa: "O'zRTXB" AJ PR bo'limi