Avtoraqamlarni sotish bo‘yicha onlayn-auksion tartibi takomillashtirildi
![](https://old.uzex.uz/files/news/temp/improved-online-auction-procedure-for-the-sale-of-license-plates_93.jpg)
Avtomototransport vositalariga ro‘yxatdan o‘tkazish davlat raqami belgilarini (RO‘DRB) rasmiylashtirish tartibining takomillashtirilishi munosabati bilan O‘zbekiston Respublikasi Vazirlar Mahkamasining «Avtomototransport vositalarini davlat ro‘yxatidan o‘tkazish va ularga ro‘yxatdan o‘tkazish davlat raqami belgilarini berish tartibini takomillashtirish to‘g‘risida» 2017-yil 31-avgustdagi 683-son qaroriga, Vazirlar Mahkamasining 2023-yil 21-iyundagi 253-sonli qarori bilan o‘zgartirish va qo‘shimchalar kiritildi.
Jumladan, Qarorning 29-bandi bilan Avtotransport vositasini boshqa shaxsga o‘tkazishda oldin berilgan (ilgari foydalanishda bo‘lgan) oshirilgan to‘lov stavkalari bo‘yicha avtotransport vositalari uchun RO‘DRB va xaridorgir harf va raqamlar kombinatsiyasiga ega bo‘lgan oshirilgan to‘lov stavkasi bo‘yicha avtotransport vositalari uchun RO‘DRB transport vositasining avvalgi egasining arizasiga ko‘ra hududiy boshqarmalarga o‘n ikki oy muddatga saqlash uchun topshirilishi mumkin. RO‘DRBni o‘n ikki oy muddatga saqlaganlik uchun to‘lov undirilmaydi.
Ushbu muddat tugagandan so‘ng, qo‘shimcha ravishda bir marotaba o‘n ikki oydan oshmagan muddatga bazaviy hisoblash miqdorining bir baravari miqdorida to‘lov to‘lagan holda RO‘DRB saqlash muddatini uzaytirish mumkin. Saqlash uchun undirilgan to‘lov summasi YHXXning Davlat yo‘l harakati xavfsizligi xizmati moddiy-texnika bazasini rivojlantirish, xodimlarini rag‘batlantirish va mukofotlash jamg‘armasiga o‘tkaziladi.
Bundan tashqari, 18-band bilan, raqobat tartiboti amalga oshmadi deb eʼtirof etilgan holatda (ikkinchi g‘olib rad etgan yoki xaridorlar mavjud bo‘lmagan holatda), axborot tizimida avtotransport vositalari uchun RO‘DRBni oshirilgan to‘lov stavkasi bo‘yicha berishni 5 kun muddat ichida avtomatik ravishda qaytadan eʼlon qilinadi.
Yutib olingan “chiroyli avtoraqam”ni rasmiylashtirish muddati 10 kalendar kunidan 30 kalendar kun etib belgilandi. Qo‘shimcha ravishda 2023-yil 1-iyuldan boshlab auksion savdolari orqali harflari bir xil kombinatsiyali avtoraqamlar sotilishi ham yo‘lga qo‘yiladi.
Mazkur qarorning to‘liq matni bilan “O‘zRTXB” AJ rasmiy vebsaytining Meʼyoriy-huquqiy hujjatlar bo‘limida tanishib chiqishingiz mumkin.
Manbaa: "O'zRTXB" AJ PR bo'limi