O‘zbekiston respublika tovar-xom ashyo birjasining davlat xaridlari bo‘yicha savdo tizimi xarid.uzex.uz da ishtirok etayotgan yirik soliq to‘lovchi toifasiga kiruvchi davlat buyurtmachilariga qo‘shimcha qulaylik yaratildi.

Xususan, endilikda yirik soliq to‘lovchi toifasiga kiruvchi davlat buyurtmachilarining hududiy filiallari ham yuridik maqomga ega bo‘lgan holda elektron raqamli imzo (ERI) kaliti orqali xaridlarda ishtirok etish imkoniyatiga ega bo‘ldilar.

Bunning uchun davlat buyurtmachisi o‘zining hududiy filiallariga ishonchnoma bergan holda “Davlat xizmatlari markazi” orqali o‘ziga tegishli bo‘lgan elektron raqamli imzo (ERI) kaliti nusxasini olishiga va davlat xaridlarda ishtirok etishiga ruxsat beradi.

Bunda, davlat buyurtmachisi shaxsiy kabinetning “Sozlamalar” bo‘limi orqali hududiy filialning tegishli maʼlumotlarini kiritgan holda xarid tizimiga qo‘shadi. Filial qo‘shilganidan so‘ng, “Menejerlar” bo‘limi orqali filial nomidan ish yurituvchi shaxs, davlat buyurtmachisining elektron raqamli imzo (ERI) kaliti nusxasi orqali xaridlarni amalga oshiradi.

Eslatib o‘tamiz, birjaning davlat xaridlari bo‘yicha xarid.uzex.uz savdo tizimida davlat buyurtmachilarining ishtirok etish tartibi O‘zbekiston Respublikasining “Davlat xaridlari to‘g‘risida”gi qonuni bilan belgilangan.

Manbaa: "O'zRTXB" AJ PR bo'limi