UZEX birjasi ISO 37001:2016 xalqaro standarti bo‘yicha qayta sertifikatlandi
2024-yil 2-aprel kuni O‘zbekiston respublika tovar-xom ashyo birjasida ISO 37001:2016 “Korrupsiyaga qarshi kurashish menejmenti tizimi” xalqaro standarti bo‘yicha qayta sertifikatlash auditi muvaffaqiyatli yakunlandi.
Bundan, Xalqaro standartlashtirish tashkiloti (ISO) baholash mezonlari asosida CERT International (Slovakiya) sertifikatlashtirish organi tomonidan o‘tkazilgan audit natijalari dalolat beradi.
Auditorlar hisobotiga ko‘ra, birja faoliyatining asosiy ijobiy jihatlari kompaniyada yosh va malakali kadrlarning mavjudligi, biznes jarayonlarining muntazam ravishda takomillashtirib borilishi, audit davomida yaratilgan ochiq va konstruktiv muhit, boshqaruv tizimida rahbariyat tomonidan namoyon etilayotgan yetakchilikdan iborat.
Audit davomida kompaniya faoliyati jarayonlari - xodimlarni ishga qabul qilish, birja aʼzolarini akkreditatsiyadan o‘tkazish, birja savdolari va davlat xaridlarini tashkil etishdan tortib to turli yo‘nalishdagi faoliyat bo‘yicha kontragentlar va biznes hamkorlar bilan ishlash jarayonlarigacha o‘rganildi.
ISO 37001:2016 xalqaro standarti birja faoliyatining barcha yo‘nalishlarini qamrab olib, kompaniya biznes jarayonlarni yuqori darajada shaffof, qonuniy va eng ilg‘or jahon amaliyoti asosida yuritish qobiliyatiga ega ekanligini tasdiqlaydi.
Taʼkidlanganidek, O‘zbekiston respublika tovar-xom ashyo birjasida korrupsiyaga qarshi kurashish siyosatining asosiy maqsadi samarali va shaffof mexanizmlarni yaratishdan iboratdir.
Buning uchun, o‘tgan davr mobaynida, birjada korrupsiyaga qarshi kurashish sohasidagi davlat siyosati va xalqaro amaliyot talablariga javob beradigan zarur sharoitlar va mexanizmlar yaratildi.
Xususan, O‘zbekiston respublika tovar-xom ashyo birjasida Komplayens-nazorat va axborot xavfsizligi bosh boshqarmasi samarali faoliyat yuritib kelmoqda.
Korrupsiyaga qarshi kurashish xizmatining yuqori rahbariyat bilan bevosita va to‘g‘ridan-to‘g‘ri o‘zaro aloqasini taʼminlash maqsadida “O‘zRTXB” AJ Kuzatuv kengashi tomonidan korrupsiyaga qarshi kurashish masalalarini ko‘rib chiqish bo‘yicha masʼul etib Kuzatuv kengashining aʼzosi Ziyayev Aziz Abduhakimovich tayinlandi.
Bundan tashqari, birjada muloqot aloqalari va jamoatchilik nazoratining samarali tizimi ham yaratilgan. Elektron savdolarda ishtirok etishda muammolarga duch kelgan holda fuqarolar va tadbirkorlar @uzexfeedbackbot, korrupsiya holatlari bo‘yicha esa @uzexanticorruptionbot telegram-botlari orqali murojaat qilishlari mumkin.
Shu bilan birga, O‘zbekiston respublika tovar-xom ashyo birjasi sifat menejmenti tizimining navbatdagi kuzatuv auditidan ham muvaffaqiyatli o‘tdi va birja savdolari, elektron davlat xaridlari va elektron tijoratni tashkil qilish va o‘tkazish bo‘yicha ISO 9001:2015 xalqaro standarti talablariga mos deb topildi.
Bunda, birjaning yuqori malakali bo‘lim boshliqlari va barcha xodimlarning o‘z xizmat vazifalarini bajarishga masʼuliyat bilan yondashuvi, professional ahil jamoa, axborotni tahlil qilishda statistik usullaridan foydalanish va ilg‘or texnologiyalarni keng qo‘llanilishi kompaniyaning kuchli tomonlari sifatida qayd etildi.
Mazkur xalqaro sertifikat, shuningdek, O‘zbekiston respublika tovar-xom ashyo birjasida birja xizmatlari yuqori sifat darajasida ko‘rsatilayotganligini tasdiqlaydi va birja faoliyatini muntazam ravishda takomillashtirib borishga ko‘maklashadi.
Manbaa: "O'zRTXB" AJ PR bo'limi