Polietilen logistikasi bosqichma-bosqich elektron tizimga o‘tmoqda
O‘zbekiston Respublikasi Prezidentining 2021-yil 17-martdagi PQ-5031-son qarori ijrosini ta’minlash doirasida 2022-yil 1-oktabrdan suyultirilgan gaz va polietilen mahsulotlarini birja savdolariga qo‘yib kelayotgan Sho‘rton GKK, o‘z mahsulotlarini O‘zbekiston respublika tovar-xom ashyo birjasining e-logistika.uzex.uz elektron logistika portali orqali yuklashni boshladi.
Xususan, o‘tgan davrda logistika portalida o‘tkazilgan auksion savdo natijalariga ko‘ra 20 ming tonnadan ziyod polietilen granulalari yuklandi hamda ushbu birja tovari bo‘yicha 1,2 mlrd so‘mlik yuk tashish xizmatlari ko‘rsatildi.
Boshlang‘ich narxlarni pasayishiga qaratilgan auksion va yuk tashuvchilar o‘rtasida raqobatning kuchayishi evaziga birja tovarlarining xaridorlari tomonidan 17,4 mln so‘mlik mablag‘lar iqtisod qilindi.
Hududlar kesimida polietilen hajmining eng katta qismi yoki 35% poytaxtga yetkazib berilgan. Samarqand va Toshkent viloyatlarining umumiy ulushlari 41% ni tashkil qildi. Bunda, polietilenning 70% furgon, bortli va bort-tentlik yuk mashinasida tashilgan.
Bundan tashqari, me’yoriy-huquqiy aktlarga muvofiq yuk tashuvchilar bilan to‘g‘ridan-to‘g‘ri shartnoma tuzish imkoni nazarda tutilgan. Mazkur shartnomalar ham birja tovar xaridorlari tomonidan logistika portaliga joylashtirilishi shart.
To‘g‘ridan-to‘g‘ri shartnomalar asosida yuklangan polietilenning hajmi 4,6 ming tonnani tashkil qilib, bu jami yuklangan polietilen hajmidan 17% demakdir. Bunda, to‘g‘ridan-to‘g‘ri shartnomlarning eng katta hajmi, ya’ni 1 ming tonna polietilen Farg‘ona viloyatiga yetkazib berilgan.
O‘z navbatida, O‘zbekiston Respublikasining Transport vazirligi va Raqobatni rivojlantirish va iste'molchilar huquqlarini himoya qilish qo‘mitasiga savdolar monitoringini olib borish hamda yuk tashish xizmatlari bo‘yicha shakllangan narxlarni tahlil va nazorat qilishni ta’minlash maqsadida, portalda saqlanadigan ma’lumotlardan foydalanish imkoniyati yaratildi. Bu esa istiqbolda yuk tashish indeksini joriy etish imkonini beradi.
Manbaa: "O'zRTXB" AJ PR bo'limi