2023-yilning 22-may kuni Pokiston tovar birjasi (PMEX) prezidenti Ejaz Ali Shoh boshchiligidagi delegatsiya O‘zbekiston respublika tovar-xom ashyo birjasiga tashrif buyurdi.

Ushbu tashrif O‘zbekiston respublika tovar-xom ashyo birjasi (UZEX) va Pokiston tovar birjasi (PMEX) o‘rtasida 2022-yilda imzolangan Anglashuv memorandumi qoidalarini amalga oshirish doirasida tashkillashtirildi.

Uchrashuv avvalida “O‘zbekiston respublika tovar-xom ashyo birjasi” AJ boshqaruvi raisi Ziyoviddin Badriddinov mehmonlarni iliq kutib olib, tashrif uchun ularga samimiy minnatdorlik bildirdi hamda O‘zbekiston va Pokiston birjalari turli yo‘nalishlarda keng qamrovli masalalar bo‘yicha o‘zaro manfaatli hamkorlik qilish imkoniyatiga ega.

Taʼkidlanganidek, O‘zbekiston respublika tovar-xom ashyo birjasi Pokiston tovar birjasi bilan hamkorlikda birja savdo vositalarini rivojlantirish va ikki mamlakat tovar bozorlarida birja mexanizmlarini keng qo‘llashda birjalararo hamkorlikni kengaytirishdan manfaatdor.

Ejaz Ali Shoh, Pokiston savdo birjasi (PMEX) prezidenti: «O‘zaro manfaatli hamkorlikni rivojlantirish uchun katta imkoniyatlarga egamiz. Ular birja savdosi, logistika, shuningdek, global darajadagi elektron tijorat kabi sohalarni o‘z ichiga qamrab oladi. Amaliy natijalarga erishish uchun qo‘shma loyihalarimizning tashkiliy-texnik jihatlari ustida ish olib boruvchi birjalarimiz ishchi guruhlarini tashkil etishni taklif qilaman».

Muloqot chog‘ida tovar derivativlarini rivojlantirish, O‘zbekiston va Pokiston tadbirkorlari o‘rtasida tuziladigan eksport-import bitimlar hajmini birja texnologiyalaridan foydalangan holda oshirish, shuningdek, savdo va kliring tizimlarini integratsiyalash imkoniyatlari muhokama qilindi.

Tadbir doirasida ikki birja mutaxassislari birjaning spot savdolarini tashkil etish va derivativlar bozorini rivojlantirish bo‘yicha o‘zaro tajriba va ekspert fikrlar almashildi.

Xususan, O‘zbekiston respublika tovar-xom ashyo birjasining yangi UZEX SPOT elektron savdo tizimi va Pokiston tovar birjasida o‘tkaziladigan elektron savdolar negizini tashkil qiluvchi MetaTrader 5 savdo tizimining taqdimotlari bo‘lib o‘tdi.

Tadbir yakunida tomonlar mutaxassislar va brokerlar uchun hamkorlikda treninglar va stajirovkalar o‘tkazish hamda Anglashuv memorandumi qoidalarini amalda tatbiq etish bo‘yicha kelgusidagi rejalar, texnik topshiriqlarni ishlab chiqish bo‘yicha ekspertlar darajasida maslahatlashuvlarni davom ettirishga kelishib oldilar.

Manbaa: "O'zRTXB" AJ PR bo'limi